ارتدادات ترشيح شوكي وصلت للبام قبل اجتماع المجلس الوطني: قيادات التراكتور كيشوفوه "غريم ضعيف” فانتخابات 2026 مغاديش يعوض أخنوش وفرصة كبيرة باش البام يقطع الطريق على الاستقلال .

مصدر الصورة

كود الرباط//

علمت “گود” أن ارتدادات ترشيح محمد شوكي، رئيس فريق التجمع الوطني للأحرار بمجلس النواب، لخلافة عزيز أخنوش على رأس الحزب، بدات كتوصل لقيادة حزب الأصالة والمعاصرة، اللي كتشوف فهاد التطور فرصة سياسية سانحة باش تدخل انتخابات 2026 بثقة أكبر، وتدير عملية استقطاب واسعة للكفاءات.

مصادر ’’گود” كتقول باللي شوكي، اللي جاي من الشبيبة ديال البام وفشل يطلع رئيس ديالها ولكن دبا غادي يولي “بين عشية وضحاها” زعيم حزب كيقود الحكومة، كاين لي كيشوفو داخل دوائر فالبام كغريم ضعيف نسبياً مقارنة مع باقي زعماء الأحزاب الآخرين، خصوصاً وأن قيادات الحزب “عارفين عليه كل صغيرة وكبيرة”، من مساره السياسي، لنقط ضعفه فالتدبير، وحتى لشبكات علاقاته المالية والاجتماعية، وكيفاش طلع نجمو فمجال المال والأعمال.

وبحسب نفس المصادر، قيادات البام عندها تقييم داخلي حول حظوظهم فالانتخابات المقبلة، ولكن لي زاد قوا فرصهم بالفوز هو أن شوكي كيتعتبر أضعف زعيم حزبي وسط تشكيلة زعماء الأحزاب اللي غادي يدخلو غمار انتخابات 2026، وهو ما كيعطي للبام هامش المناورات السياسية أوسع خلال المرحلة الجاية، سواء فبناء التحالفات أو فالتأطير الانتخابي.

فهاد السياق، حزب الأصالة والمعاصرة غايدير المكتب السياسي غدا الجمعة، قبل مايعقد المجلس الوطني ديالو نهار السبت 31 يناير 2026، بقصر المؤتمرات الولجة بمدينة سلا، ابتداءً من الساعة العاشرة صباحاً.

وقبل انطلاق أشغال المجلس، غادي تكون تصريحات صحفية لرئيسة وأعضاء المجلس الوطني، مع السماح بأخذ الصور والفيديوهات إلى غاية عزف النشيد الوطني، على أن تنطلق الجلسة المغلقة مباشرة بعد نهاية كلمة رئيسة المجلس الوطني.

ومباشرة بعد اختتام أشغال المجلس، غادي تتعقد ندوة صحفية لقيادة الحزب، بمشاركة فاطمة الزهراء المنصوري، ومحمد المهدي بنسعيد، وفاطمة السعدي، ونجوى كوكوس، للحديث على انعقاد هاد الدورة، والمستجدات السياسية والتنظيمية داخل الحزب، مع فتح المجال لطرح جميع الأسئلة وتسليط الضوء على الوضع الداخلي للبام والسياق السياسي العام.