بعد سيدنا خاصنا نعتارفو: براڤو لقجع وشكرا ليك. نجحتي ف"الكان" وجدتي كلشي باش نربحو. رفعتي راس لمغاربة عالي .

مصدر الصورة

كود احمد الطيب كازا ///

المغرب خسر كأس افريقيا للامم ولكن ربح بزاف. تنظيم واعر. ملاعب فالستاندار الدولي. شهر عاشو لمغاربة “كان” تاريخي. فوزي لقجع رئيس اللجنة المنظمة ورئيس الجامعة الملكية لكرة القدم كان وعد باش تكون تاريخية، ووفى. نجح فالرهان ديالو.

فوزي خلى المغرب فاعل فالكورة الافريقية والعالمية. ما عمرنا تاريخيا كان عندنا هاد الدور. فالاتحاد الافريقي ما كناش مسوقين ليه بزاف وفالفيفا ما نهدروش. دابا عندنا عضو فالجنة التنفيذية للكاف وللفيفا. بفضل لقجع.

هاد الاشادة اللي دارها سيدنا راه فيها اشادة بالخدمة اللي دار فوزي لقجع على رأس الجامعة الملكية المغربية لكرة القدم.

كان سيدنا رسل “برقية تهنئة” لاعضاء المنتخب الوطني” ليلة الاحد 18 يناير 2026 وفيها شكر لعابة وادارييين و”مسؤولي الجامعة الملكية المغربية لكرة القدم، بأحر تهانئنا على هذا الإنجاز القاري المشرف “.

وقال سيدنا لهادو “قدمتم للعالم نموذجا لما يمكن للشباب المغربي والإفريقي أن يحققه عندما يتسلح بالثقة في مواهبه وقدراته “. هنا فيه اشارة واضحة للخدمة اللي دارها فوزي لقجع.

24 ساعة بعد الرسالة اي 19 يناير بتعليمات من الملك استقبل الامير مولاي رشيد “بقصر الضيافة بالرباط، أعضاء المنتخب الوطني لكرة القدم، الذي بلغ المباراة النهائية لكأس أمم إفريقيا (المغرب-2025). وكان مع اللعابة والمدرب رئيس الجامعة الملكية المغربية لكرة القدم فوزي لقجع. حضر للاستقبال الرسمي تأكيد للخدمة اللي كيديرها.

هاد التيرانات وهاد التنظيم كان خاصو اعتمادات مالية وتعبئة كبيرة لكل الاطراف. الحكومة سهلات كلشي ولكن راه ديما الحكومات كانت تسهل مهام مسؤولين على احداث كبيرة تنظم فالمغرب، ولكن ماشي ديما هاد الانشطة تكون ناجحة بحال اللي وقع فتنظيم “الكان”. عليها ف”كود” كنقولوها بوضوح: براڤو فوزي لقجع. شكرا على كلشي اللي درتيه وكديرو لبلادك