جماعة الويدان.. الدرك شد مشتبه فيه فقتل إمام جامع بدوار تيكوتار .

مصدر الصورة

كود مراكش//

عاشت جماعة الويدان بإقليم مراكش، فالساعات الأخيرة من ليلة الاثنين/ الثلاثاء 20/19 يناير الجاري، على وقع جريمة قتل صادمة هزت الساكنة وكسرات هدوء المنطقة.
الجريمة وقعات بدوار تيكوتار، من بعد ما لقاو إمام مسجد ميت، وظهر أنو تعرض لاعتداء خطير بآلة حادة داخل المسكن التابع للمسجد اللي كيخدم فيه.
وحسب المعطيات اللي توصلات بها “كود”، فالمشتبه فيه، اللي كيتقال كان فحالة غير طبيعية، هاجم الإمام ووجه ليه ضربات خطيرة خلاتو يطيح مدرج فالدمايات ديالو وفارق الحياة متأثرا بالجروح البليغة.
وما وقفش الأمر هنا، بحيث تعرضات حتى زوجة الإمام لاعتداء خلف ليها جروح خطيرة، استدعات نقلها على وجه السرعة لمستعجلات المستشفى الجامعي محمد السادس بمراكش باش تتلقى العلاجات الضرورية.
ومباشرة من بعد وقوع الجريمة، استنفرات السلطات المحلية والوقاية المدنية وعناصر المركز الترابي للدرك الملكي بأولاد حسون، مرفوقين بعناصر التشخيص القضائي، اللي حلو بعين المكان وباشرو المعاينات والإجراءات القانونية اللازمة.
كما تم نقل جثمان الإمام لمستودع الأموات قصد إخضاعو للتشريح الطبي، تحت إشراف النيابة العامة المختصة، باش نتحدد الأسباب الحقيقية للوفاة وكل ملابسات القضية.
التحريات الميدانية والتقنية اللي داروها عناصر الدرك الملكي ما طولاتش، بحيث فظرف ساعات قليلة قدرو يحددو هوية المشتبه فيه ومكان تواجدو، وبتنسيق مع السلطات المحلية والقوات المساعدة، تم توقيف الظنين اللي العمر ديالو حوالي 35 سنة. كما مكنت الأبحاث من حجز الأداة اللي استعملات فارتكاب هاد الجريمة الخطيرة.
وتم وضع المشتبه فيه تحت تدابير الحراسة النظرية، لمواصلة البحث معاه تحت إشراف النيابة العامة المختصة، للكشف على تفاصيل وخلفيات هاد الفعل الإجرامي، واللي كترجّح بعض المعطيات أنه ناتج على خلاف مدني سابق بين الطرفين.