مراكش كتدخل التاريخ: المغرب كيستضيف لأول مرة قمة "IAAPA" العالمية بمشاركة أزيد من 100 دولة .

مصدر الصورة

عمر المزين – كود///

لأول مرة فالتاريخ، كيستضف المغرب قمة IAAPA العالمية من 19 حتى 21 يناير بمدينة مراكش، وهو حدث دولي كبير كيجمع كبار الفاعلين والمستثمرين فمجال الترفيه والأنشطة السياحية، وكيأكد المكانة المتصاعدة ديال المملكة كوجهة جذابة للاستثمار السياحي.

هاد القمة كتنظم بشراكة مع IAAPA والشركة المغربية للهندسة السياحية، وترأست أشغالها فاطمة الزهراء عمور وزيرة السياحة والصناعة التقليدية والاقتصاد الاجتماعي والتضامني، بحضور أعضاء من مجلس الإدارة العالمي ديالIAAPA، وعماد برقاد المدير العام للشركة المغربية للهندسة السياحية، إضافة لعدد مهم من صناع القرار والمستثمرين والمهنيين من داخل وخارج المغرب.

فالافتتاح، أكدت الوزيرة بلّي هاد القمة جات فواحد الوقت اللي كيعرف فيه القطاع السياحي المغربي دينامية غير مسبوقة، حيث سجّل المغرب رقم قياسي تاريخي قرّب لـ20 مليون سائح سنة 2025، وزادت عززاتو الإشعاع الدولي لكأس أمم إفريقيا، اللي برهن على قدرة المملكة فتنظيم التظاهرات الكبرى.

وقالت الوزيرة بلغة واضحة: “المغرب كيشهد نمو سياحي قوي بفضل الرؤية المتبصّرة لصاحب الجلالة الملك محمد السادس نصره الله. خارطة الطريق السياحية بدات كتعطي نتائج ملموسة، وهدفنا هو نطورو عرض الترفيه باش نرسخو المغرب كوجهة سياحية متكاملة، مدعومة بميثاق استثماري تنافسي كيشجع المستثمرين الوطنيين والدوليين”.

ومن جهتو، عبّر بيتر فان دير شانس، عضو مجلس إدارة IAAPA، على اعتزاز الجمعية بتنظيم هاد القمة فالمغرب، مؤكداً أن المملكة كتتوفر على إطار مؤسساتي قوي، وبنيات تحتية حديثة، ومناخ استثماري جذاب، الشي اللي كيخليها وجهة استراتيجية وسريعة النمو فمجال الترفيه والتنشيط السياحي.

قمة IAAPA بمراكش جمعت أكثر من 150 مهني وخبير ومستثمر من أكثر من 100 دولة، ناقشو خلالها التوجهات العالمية الكبرى فصناعة الترفيه، وتبادلو التجارب الناجحة، وبحثو سبل تطوير منظومة ترفيهية قادرة تطوّل مدة إقامة السائح وتخلق قيمة مضافة حقيقية للاقتصاد السياحي.

وبحسب عماد برقاد، فهاد القمة كتشكل فرصة فريدة للمستثمرين باش يتموقعو فواحد السوق اللي كيعرف نمواً متسارعاً، وكتربط بشكل مباشر بين الفرص الاستثمارية والمشاريع الواعدة فصناعة الترفيه بالمغرب.