الياس المالكي من سطح دارهم جاب بيكي وشارك في الكينگس ليگ راه معجزة داكشي لي دار، معجزة من وراها بزاف ديال الموهبة ولكن في البلاد الغلط هاهو من محاكمة لمحاكمة بينما سبيد قال ودار كثر منو وتشهر وهاحنا مستقبلينو استقبال الابطال .

مصدر الصورة

محمد سقراط-كود///

حتى حنا كان غادي يكون عندنا سپيد ديالنا كيدور في العالم وكيستقبلوه الدول، وفين مامشى كتلقى الحشود تابعاه، هادشي ماشي أوهام ولكن واحد الوقت راه كان إلياس المالكي كينافس سپيد في الستريم، طبعا سبيد معاوناه لونگلي ومعاونوا الدولار، ولكن هادشي لي مديور عليه كان كيدار على الياس فاش كيمشي لأي مدينة في المغرب، وكون واصل وطور راسو كثر كان غادي يتدار عليه حتى في دول خرى في العالم، ولكن التطوير في هاد المجال كيبغي مناخ ديال الحرية وقوانين كتحميها، وهادشي للأسف مكاينش في المغرب لي عامر مقدسات وكل عام كيتزادو يكثروا وصلات دابا حتى لمالين الطاكسيات، وأي جمعية تنوض تدعيك وكاين لي باغي يحارب التفاهة وبنقي محتوى الويب المغربي، ماقالوهاش حتى الميريكانيين لي ماليه ديال بصح.

إييه مزيان الدولة تكون قوية ومسيطرة وفي تفس الوقت مزيان حتى الدولة تدخل سوق راسها وتخلي بنادم يعبر على خاطرو، وتدير ليه قوانين كتحمي حرية التعبير والعبادة وأيتها حاجة من غير التطرف الإسلامي طبعا، لا حرية لأعداء الحرية، مناخ ديال الحرية كيزداهر الفن والابداع وكاع أشكال التعبير، وهادشي لي خاريين فيه هاد الساعة وبالجهد مقارنة مع أغلب سكان الكرة الأرضية، ماعندناش حتى جداز صد ثقافي وتعبيري وفني قادر يحمي البلاد والعباد من الاختراق الأجنبي، كتلقى بنادم كيبان كبير بعقلوا وكيبغي اردوغان وحسن نصر الله كيعتابرو بطل، وحماس مقاومة ماشي حركة إرهابية بحال أي حركة إسلامية مسلحة، ومآمن بلي كاع دول العالم حسن منو وخاصو منهم اعتراف بأنه واعر حتى هو.

الحرية راه زينة وفيها كتزداهر أشكال الابداع، هاهي الصين دولة مليارية اقتصاد قوي إنتاجية عالية ومع ذاك بلا حرية ماقادراش تفرض ثقافتها على العالم، هونك كونگزغيرًجزيرة صغيرة حداها العالم كان مأثر بيها بسباب السينما وافلام الاكشن مكاينش قهوةزفي المغرب مادوزااش أفلام جون وو وجاكي شان وجيت لي وباقي مدرسة هونك كونك، كوريا حاليا راه جولة ديال بي أي إس غادي تدخل مليار والصرف، العالم كيعرف كوريا من خلال الابداعات الفنية الدراما والسينما والمرسيقى والمسلسلات وكولشي، هنا في المغرب كاين شباب ميحلموا بكوريا ويقراو فيها على ود التأثير الثقافي ديالها، حيت حتى واحد مكيقول في كوريا راه الدراري دايرين الماكياج وكيشطحوا تفاهة خاص نحاربوها، بينما في المغرب غير يتشهر شي واحد تلقاه متبوع بالمحاكمات ويقدر يغرق حباسات، طوطو أشهر رابور في تاريخ المغرب الوحيد لي كيدير سهرات خارج المغرب سولد آوت، كل مرة داعيينوا، الياس المالكي من سطح دارهم جاب بيكي وشارك في الكينگس ليگ راه معجزة داكشي لي دار، معجزة من وراها بزاف ديال الموهبة ولكن في البلاد الغلط هاهو من محاكمة لمحاكمة بينما سبيد قال ودار كثر منو وتشهر وهاحنا مستقبلينو استقبال الابطال.