فهاد الكان بان باللي المغرب ما عندو صديق. حنا ماشي عرب ولا مشارقة حنا مغاربة. هاجمنا المصري والجزائري والسينغالي والبلجيكي والفرنسي وهادي مناسبة نتفكرو باللي حنا جزيرة وما نعولو غير على ريوسنا .

مصدر الصورة

هناء ابو علي كود ////

“االمغرب ما عمر كان عندو صديق” وا “لمغاربة ما تحاولوش ترضيو الاخر” سوا فالشرق او الغرب او الشمال “رضيو ريوسكم” و”هاد لبلاد ديما معرضة عبر التاريخ للهجمات”. هاد لكلام لعبد الخالق كلاب الباحث فالتاريخ وصاحب كتاب “اوثان السلفية التاريخية” واحد المدافعين الشرسين على تمغرابيت او “الموري كيف كيسميها كلاب وعدد من الباحثين فالتاريخ.
ايلى سقطنا هاد لكلام على اللي وقع لينا فكأس افريقيا اللي غتلعب الفينال ديالها اليوم او على اللي وقع فكأس العرب اللي كانت فقطر غادي نلقاو كلامو صعيب. كيتقاطع فامور كثيرة من كلام المؤرخ عبد الله العروي اللي قال المغرب جزيرة.

كتشفنا بالفعل ماشي بالقول باللي حنا لمغاربة ما كنشبهو لحد. عرب اسيا دارو حدود باش يبانو مختالفين مع ما سموه “عرب افريقيا”. هاد الشي قالوه ناسهم وسوقات ليه قنواتهم بحال “الجزيرة” ووليداتها “بيين” و”الكاس”…. كان تمويل كبير قطري لتسويق ايدلويوجيا قومية. واخا حنا اصلا ماشي عرب. حنا مغاربة امازيغ ومن بعد وقع اختلاط ولكن ما عمرنا كنا عرب ولا غاديين نكونو عرب. راه عرب الشرق ما عمرهم يقبلو وحنا ما عمرنا نكونو عرب.

نجيبو لكأس افربقيا. المغرب دار مجهود كبير ماشي على مستوى البنيات التحتية الواعرة بل حتى فاظهار حسن الاستقبال والكرم المغربي. واش ارتكبنا خطأ، ممكن، ولكن هادي راها من طبيعة المغربي الموري. كنخلصو عليها بزاف.

بدينا باستقبال الدزايريين بطريقة مبالغ فيها. شفناهم ولكن على العموم باحترام كبير، كيدورو براياتهم وبتونيات منتخبهم. ما قرب ليهم حد. شفنا فالتيرانات اللي لعبو فيها الرايات المغربية كتدعمهم. من حقنا نسولو واش الراية المغربية ممكن تهز وسط الجزائر؟ طبعا اللا. مستحيل. راه كل واحد فيكم عاقل على تصرفات مسؤوليهم وحكاياتو مع الراية.

باش تقصات الجزائر فالربع من نيجيريا هاجموا المغرب. منتخب ما ضرب حتى كورة للبوطو وكان ميت وبررو الفشل بالكولسة. سبونا ونساو كاع الكرم المغربي. ماشي كلشي ولكن باش وجه هادو. تصرفاتهم كتأكد باللي حنا فالجزيرة باللي الشعب الجزائري دجنوه على كره المغرب.

لمغاربة دعمو مصر فاكادير. كلشي تهلى فهاد المنتخب فاكادير. راه ماشي سلطات بلادهم او اتحادهم لكرة القدم اللي تهلى اللا. القرار كان اكبر من ذلك. كانو فاحسن اوطيل. يمكن كانت عند مصر احسن اقامة من بين جميع المنتخبات المشاركة فالكان. والجزاء فاللخر اشنو هو. ناص مدربهم سبنا. ناض خوه عيرنا. باش لعبو مع السينغال نصف النهاية وخسرو تسيفو. عيرو لوطيل وعيرو لبلاد وكلشي.

جات السينغال وقبل الفينال. العلاقات مع السينغال تاريخيا احسن بكثير مع العلاقات لا مع مصر ولا الجزائر، كنتكلم على العلاقات السياسية والاواصر الثقافية. مدرب منتخبهم وجامعتهم هاجمات التنظيم. تقدر تفهمها. قبل الفينال بساعات خاص تمارس نوع من الضغط وتبنز لبلاد، غير ما تجيش من دولة تعتبر صديقة وبزاف. ولينا فوزارة الخارجية السينغالية تخرج بيان والاتحاد الافريقي ينشر اخر.

دابا وقعو حوادث مختالفة مع دول من الشرق والشرق والاوسط والجنوب بلا ما نهدرو على عنصرية مدرب جنوب افريقيا البلجيكي اللي استخسر فبلادنا تكون عندها معايير الفيفا فتنظيم كأس افريقيا.

اه نسينا دور دولة قطر فتسميم الاجواء العربية من خلال قنواتها. كتجيب شي كوايرية كانو فاشلين فالكورة فعمومهم وكلهم داعمين للتيار الاخواني باش ينشرو سمومهم. شفنا كيفاش قطر الشيخة موزة وقطر تميم كتدعم الجزائريين بحال خديجة بن گنة وعبد الحفيظ الدراجي باش يشعلو العافية. قطر كتخلصهم. فاخلاقيات مهنة الصحافة ايلى كنتي فوسيلة اعلام معينة ممنوع تستعمل وسائل التواصل الشخصية للتعبير عن مواقف دولتك. شفنا البي بي سي جرات على صحافي على قبال تدوينة. وشوفو قطر كيفاش كتوظف الفتن بين الدول فسياستها الخارجية.

حتى هاداك المغربي جواد بايدة خاصها تجري عليه ما كانتش ترجعو بعد ما غلط حتى هو.

دابا شفتو باللي الفرنسي بحال داك الصحافي ديال “ليكيب” ولا المدرب البلجيكي لجنوب افريقيا ما باغيينش المغرب يكون زوين وكأس افريقيا طلع النيفو، ناضو هاجمو المغرب. شفنا الشرقي وشفنا الجنوبي كلهم هاجمو المغرب وكلها بوسائلو.

لمغاربة خاصهم يعرفو باللي عايشين فجزيرة. خاصهم يديوها غير فبلادهم. يركزو على مصالحهم. علاقاتنا ما خاصهاش تغلب عليها العاطفة خاص تغلب عليها المصالح. الموري ما خاصوش يحس بالنقص. راه تاريخو مجيد وحاضرو زوين ومستقبلو واعر