قطر كتهاجم المغرب وتحارب "الكان". طالقة الجزائري الدراجي الي داعماه ينشر حقارتو. قال: كأس افريقيا بالمغرب اللي خسر الجزائر وراه حنا ممنوعين من التأهل للنصف .

كود مصطفى الشاذلي ////

مصدر الصورة
قطر كتشن حرب على المغرب وعلى كأس افريقيا للامم اللي محتاضناه بلادنا. طالقة هاد الدولة البترولية الصحافي الجزائري حفيظ الدراجي يسب بلادنا ويقلز من تحت الجلابة باش يتاهمنا باللي منعنا بلادو الجزائر دوز لنصف نهاية كأس افريقيا.

هاد المعلق اللي عايش وخدام مع قطر فقنواتها “ييين سبور” قال باللي “الجزائر لم تخسر كأس أفريقيا بالمغرب من خسر الجزائر” فايحاءات حقيرة منو ومن دولتو الداعمة ليه.

بعد اقصاء بلادو بالكورة ماشي بشي حاجة اخرى ضد نيجيريا بجوج لزيرو فملعب مراكش البارح السبت 10 يناير 2026 عاود نشر فحسابو اللي كتراقبو سلطات قطر وكدعمو باللي “اللعابة” كانو يعلمون أنهم ممنوعون من المرور إلى نصف النهائي” واضاف “كنا نعلم أن سنتوقف في ربع النهائي مهما كانت الظروف”.

دابا هاداك الماتش لكبير بزاف للنيجيريين والرباح بجوج لزيرو وعوض ما يهاجمو اللعابة والمدرب ناض هاد المدعوم القطري كيشكك فكلشي. فزاد فتدوينة اخرى كتيبن الجهالة ديالو “موعدنا مونديال 2026 حيث تكون الأجواء أنظف والظروف أحسن” ثم زاد جملة كلها خبث “الحمد لله على سلامة أولادنا”. يا يا ولد ….. كلشي اللي دارو الجمهور المغربي وكلشي الظروف اللي توفرات لهاد المنتخب وكتقول ليه الحمد الله بحال ايلى راجع من حرب.

شفتو حقارتو. ولكن علاش ف”كود” كنقولو راه هاد التعاليق المسؤول عليها هو قطر هو شيخها تميم بن حمد؟ لان هاد الصحافي خدام عندهم فقناة ديال الدولة القطرية. فالاعراف ما كاينش حسابات شخصية. كل ما يعبر عنو هاد الصحافي راه تتحملو القناة والدولة اللي عايش فيها. راه مؤسسات مهنية كبيرة بحال البي بي سي جرات على صحافي كتب فصفحتو امور لا تتلاءم مع مهنيتها. هادا مقيل يهاجم المغرب وقطر كدعمو

الان القضية ماشي مع هاد الصحافي بل مع دولة قطر مع شيخها اللي مخلي هادا يهاجم بلادنا