ردو البال يا المغاربة.. الأرصاد الجوية لـ"كود": الشتا غا تكون مجهدا وشي مرات رعدية والكز حتا هو كاين وها فين غادي يطيح الثلح (تفاصيل الحالة الجوية ديال هاد السيمانة) .

مصدر الصورة

عمر المزين – كود////

من المرتقب باش يبقى تأثير المنخفض الجوي مستمر اليوم فالمغرب، وهاد الشي غادي يخلّي الطقس يكون ما مستقرش، مع نزول أمطار مهمة وأحيانًا رعدية فبزاف ديال المناطق.، وهادشي أكدوا الحسين يوعابد المسؤول على التواصل داخل الأرصاد الجوية فتصريحات لـ”كود”.

ذكر يوعابد باللي الشتا غادي تهم الأطلس الكبير والمتوسط والمناطق اللي حداهُم، الريف، سايس، الساحل المتوسطي، السهول الأطلسية، سوس، وزيد عليهم شمال غرب الأقاليم الجنوبية وعدد من مناطق الوسط والشرق.

وزيد على هاد الشي، متوقع باش تطيح الثلوج فمرتفعات الأطلس الكبير والمتوسط والهضاب العليا اللي الفوق ديالها كيتجاوز 1200 متر، وحتى قمم الريف ممكن تشوف ثلوج خفيفة.

وفنفس الوقت، درجات الحرارة، حسب المتحدث لـ”كود”، غادي تهبط بشكل ملحوظ، خصوصًا نهار الثلاثاء والأربعاء. الجو غادي يكون بارد وحتى قارس فالجبال والهضاب العليا، ودرجات الحرارة الدنيا ممكن تهبط لتحت الصفر فمرتفعات الأطلس.

أما فالمناطق الساحلية والأقاليم الجنوبية، فالبرودة غادي تكون أخف شوية، وزيد عليها رياح قوية نسبيًا حتى قوية فبعض المناطق، اللي غادي تزيد تحسّس بالبرد.

وها التوقعات هاد السيمانة بالتفصيل حسب ما كشف عليه يوعابد لـ”كود”:

اليوم الاثنين:

الجو غادي يكون ممطر ومثلج فبزاف ديال مناطق البلاد. أمطار وزخات رعدية أحيانا، ومحليا قوية، خصوصا فالأطلس ومناطقه الغربية، الريف، سايس، الساحل المتوسطي، السهول الأطلسية، سوس، وشمال غرب الأقاليم الجنوبية، وحتى بعض مناطق الوسط والشرق.

الثلوج متوقعة فمرتفعات الأطلس الكبير والمتوسط اللي فوق 1200 متر، مع احتمال ثلوج خفيفة فوق قمم الريف. الرياح غادي تكون قوية نسبيًا، خاصة فالأطلس، السواحل الوسطى والمنطقة الشرقية.

انهار الثلاثاء:

انخفاض كبير فدرجات الحرارة، والجو غادي يكون بارد بزاف وحتى قارس فالأطلس، الريف والهضاب العليا، والثلوج غادي تستمر فالأطلس الكبير والمتوسط والهضاب العليا، مع احتمال ثلوج خفيفة فالريف.

الشتا غادي تهم شرق الساحل المتوسطي، شمال المنطقة الشرقية، الأطلس، سايس، والسهول الأطلسية ما بين الرباط وأكادير. الرياح قوية وكتزيد الإحساس بالبرد.

انهار الأربعاء:

جو بارد إلى شديد البرودة، خصوصًا فالأطلس، وبارد نسبيًا فالريف، الجنوب الشرقي والهضاب العليا، وممكن تبقى بقايا ديال الثلوج الخفيفة فمرتفعات الأطلس الكبير والمتوسط، مع سحب عابرة فالشمال الغربي وشمال الشرق. الرياح غادي تبقى نشيطة.

انهار الخميس وانت طالع:

متوقع باش يتحسّن الطقس بشوية بشوية، وترجع الأجواء مستقرة نسبيًا. الخميس السماء غادي تكون قليلة السحب، ومع الجمعة والسبت ممكن تمر سحب عابرة فالشمال الغربي، ودرجة الحرارة غادي تطلع بشوية وبالتدريج فالنهار فجل مناطق البلاد.