الخبير فالمناخ بنعبو لـ"كود": وخا الأرقام المسجلة فحقينة السدود المغربية راه هادشي ماشي مؤشر للتراخي وخاص تفعيل البوليس ديال الما .

عمر المزين – كود///

أكد محمد بنعبو المدير ديال المركز الوطني للأمن البشري والتغيرات المناخية باللي كاين تغيير إيجابي فحقينة السدود المغربية بعدما شهدات الموارد المائية فبلادنا ارتفاعا مهما، وهادشي انعكس بمزيان على نسب الملء بعدد من المنشآت المائية.

ومن أهم هاد المنشآت المائية، كيف قال بنعبو لـ”كود” كاين سد الوحدة اللي سجّل أعلى ارتفاع فالواردات المائية، بنسبة ملء وصلات لـ48%، مبرزا باللي هادشي كيعزز المخزون المائي بحجم إجمالي يصل إلى 1704 مليون م3، وموراه سد إدريس الأول بنفس الحوض المائي لسبو بحجم مائي إجمالي 433 مليون م3 وبنسبة ملء تصل الى 38%.

أما السد ديال واد المخازن فالحوض المائي اللوكوس فقد وصلات النسبة ديال الملء ديالو 48% بخزان مائي وصل لـ597 مليون م3، وسد سيدي محمد بنعبد الله بنسبة ملء وصل لـ88% وبخزان مائي يقارب 900 مليون م3.

وكشف بنعبو لـ”كود” باللي كبريات السدود المغربية مزال شبه فارغة على مستوى الحوض المائي أم الربيع، مشيرا باللي سد بين الويدان وصلات النسبة ديال الملء لـ15% مقارنة بـ5% بالعم المائي بحجم مائي إجمالي وصل لـ192 مليون م3.

مصدر الصورة

وبخصوص السد ديال المسيرة ثاني أكبر منشأة مائية فبلادنا، فقد أفاد الخبير فالمناخ باللي وصلات نسبة ملء الحقينة ديالو 4% مقارنة بـ1% فالسنة المائية وبحجم مائي إجمالي وصل لـ113 مليون م3.

وأضاف باللي هاد التحسن الإيجابي كيظل تحسن موسمي بعد مواسم ديال الجفاف مناخية هيكلية حقاش مايمكنش الهضرة عن تعاف مائي شامل مع استمرار المؤشرات ديال الإجهاد المائي فمعظم الأحواض الوطنية وفالمقدمة ديالها حوض ملوية وسوس ماسة وام الربيع.

المتحدث لي هضرات معاه “كود” شدد على أنه رجع ضرورية ولازم تجاوز آثار هاد الجفاف المستمر عبر نهج حسن الإدارة الداخلية للأحواض المائية، ويكون تفعيل آليات التضامن المائي بين الجهات.

كما دعا الخبير فالمناخ باش تكون سياسة فلاحية جديدة كترتكز على الرقمنة وحتى التكنولوجيا فالتسيير والتحلية وإعادة الاستعمال ديال للمياه العادمة، مؤكدا باللي الوضع المائي دبال دبا وخا من الأرقام المسجلة وطنيا لكن هي ماشي مؤشر للتراخي بل خاص تفعيل البوليس ديال لما ولجان اليقظة فإطار إرساء دعائم الحكامة المائية الجيدة.