صادق الكنيست الإسرائيلي لبارح لاربعا، على قانون جديد كيكرم فيه اليهود المغاربة لي هاجروا لإسرائيل، وكيستحضر هاذ القانون ذكرى اللي خسرو حياتهم فمسار الهجرة، هاد الخطوة جات باش تعطي بعد تاريخي وثقافي للمجتمع المغربي وسط إسرائيل.

رئيس حزب “شاس” وعضو الكنيست آرييه درعي كال بأن هاد القانون هو انتصار لدائرة تاريخية كتخص المجتمع المغربي، وخاص دولة إسرائيل تعترف بالتضحيات ديال الآباء والأجداد لي هاجروا فظروف صعيبة وبقاو محافظين على العادات والتقاليد ديالهم، درعي من مواليد مكناس وهاجر مع العائلة ديالو لإسرائيل سنة 1968، وكيعتبر من أبرز الوجوه السياسية الإسرائيلية المنحدرة من المغرب.

اليوم الوطني غادي يتخلد ف 23 طيفيت حسب التقويم العبري، اللي كيتوافق مع ذكرى سفينة “إيغوز” لي غرقات ف10 يناير 1961 حدا الحسيمة، وكان فيها 44 يهودي مغربي فهجرة سرية نظّمها الموساد، السفينة تشققات وغرقات، وماتو فيها الناس، تلقاو غير 22 جثة ودفنوهم فالقدس.

القانون الجديد كيأمر بإدماج التراث اليهودي المغربي فالمناهج الدراسية، وكينظم جلسة خاصة سنويا فالكنيست باش تحيى هاد الذكرى، هاد الشي جا باش يقدّم الاعتبار للبعد الثقافي والتاريخي ديال اليهود المغاربة، اللي كيشكلو واحد من أكبر المكونات ديال المجتمع الإسرائيلي.

حسب الإحصائيات، عدد الإسرائيليين من أصول مغربية قريب من مليون، اما فالمغرب بقاو فيه غير ثلاثة آلاف يهودي، هاد القرار كيجي حتى فإطار العلاقات المغربية–الإسرائيلية لي تحسنات بزاف من 2020 بعد اتفاقيات أبراهام، ولي من بعدهم زادت حركة التنقل والتبادل بين الدولتين.

هاد اليوم الوطني غادي يكون فرصة باش يحتافلوا بتاريخ الهجرة والتضحيات ديال اليهود المغاربة، ويخلي الشباب الإسرائيلي يعرف الجذور ديالو ويقدّر التراث الثقافي والتاريخي ديال المغاربة اليهود.