دارت محكمة الاستئناف بفاس، الثلاثاء 30 دجنبر الجاري، الجمعية العمومية ديالها برسم السنة القضائية 2025، وذلك طبقا لمقتضيات المادة 33 من قانون التنظيم القضائي.

وخلال هاد الجمع، قدم الزبير العباسي الرئيس الأول للمحكمة وعبد الرحيم زيدي الوكيل العام للملك، كل واحد فيهم فالمجال ديالو، عرض مفصل بالأرقام والمعطيات والصور الموثقة على النشاط القضائي ديال المحكمة، سواء على مستوى الرئاسة ولا النيابة العامة، خلال السنة اللي فاتت.

العروض تضمّنات دراسة ديال السبل الكفيلة بالرفع من نجاعة الأداء القضائي، وتحديث طرق العمل، وزاد عليها البرنامج الثقافي والتواصلي، ومواضيع التكوين المستمر، مع تحديد الحاجيات من الموارد البشرية والمادية. كما عرض الرئيس الأول برنامج تنظيم العمل بالمحكمة اللي تدار من طرف مكتب المحكمة، فإطار تحسين الحكامة وجودة الخدمات.

وسجّلات الجمعية العامة ديال المحكمة، بنوع من الإيجابية، الحصيلة القضائية المحققة فـ2025، واعتبراتها نتيجة مباشرة للمجهودات الكبيرة اللي داروها جميع المتدخلين فالمرفق القضائي، من مستشارين، ونواب الوكيل العام للملك، وموظفي كتابة الضبط وكتابة النيابة العامة، وكافة مساعدي القضاء، وعلى رأسهم المحامين والشرطة القضائية، كل واحد من الموقع ديالو، باش يتصفّى المخلف، ويتحسّن الأداء، وترتفع النجاعة القضائية، خدمة للمواطن والعدالة والوطن.

وفنفس السياق، دعا الرئيس الأول والوكيل العام للملك جميع القضاة إلى مواصلة العمل خلال السنة القضائية الجديدة 2026 بنفس الجدية والعزيمة، باش تتحقق نتائج أحسن، مع الاستمرار فالتفاعل الإيجابي مع المبادرات اللي كيطلقها المجلس الأعلى للسلطة القضائية، واحترام التعليمات والتوجيهات الصادرة عن رئاسة النيابة العامة، خصوصًا فتنفيذ السياسة الجنائية داخل الدائرة القضائية.