كود الرباط//

الفريق الاستقلالي بمجلس النواب شاعل من دبا، ف اجتماع رسمي بالرباط، حسب مصادر “گود”، عدد من النواب طالبو الأمين العام نزار بركة، يزير السمطة من دبا باش ما يتعاودوش نفس الأخطاء.

ومن القضايا لي ثاروها بعض البرلمانيين، قبل قليل، موضوع الفراقشية وتراجع المغرب في مؤشر إدراك الفساد وعدم قدرة الحزب على تقييم 14 سنة من المخطط الأخضر، بحيث فشلت اللجنة الموضوعاتية لي ترأسها استقلالي وفيها أعضاء كلهم عندهم تضارب المصالح إلا القلة بحال رشيد حموني وعبد الصمد حيكر والنائبة ياسمين لمغور، أما الباقي عندهم فيرمات وضيعات فلاحية ومجازر وو.

برلماني كعا وقال لبركة، وفق معطيات حصلت عليها گود، بلي ميمكنش تدخل للحكومة الحالية بلا ما يكون تقييم ومراجعة للسياسة الفلاحية وعدم تكرار خطأ الفراقشية وطالب بتقييم موضوعي لمخطط المغرب الأخضر.

الاستقلال دخل من دبا سخون، غايكون مزعج للبام كيف كان مزعج للأحرار فالحكومة السابقة. برلمانيون مخداوش حقهم ف كعكة الاستوزار ومناصب اخرى بحال مكتب مجلس النواب، غاذي يحيحو.

الاستقلال عينو ف وزارة الفلاحة، باغين يديوها. وطبعا بدا بتصفية الحسابات مع حليفهم السابق الأحرار.