كود علي الصافي مراكش ///

فضيحة كبيرة وخطأ سياسي فادح دارو نزار بركة الامين العام لحزب الاستقلال البارح. هاد السيد اللي ما بين حتى رغبة طيلة الحملة الانتخابية باش يجي اللول ودار تنسيق مع التراكتور فشي دوائر وجابت ليه بنت الباشا الطاشرون اللي شرا من عند عائلتها ارض تاسلطانت اللي خرجات بفضيحة كبيرة، باش يكون وكيل لائحة ديال الميزان فمراكش، خرج بتصريح البارح السبت 3 اكتوبر 2026 بمقر الحزب بالرباط باش يعلن خبر فايك. خبر ماشي صحيح وهو ان المجلس الوطني لحزب الاصالة والمعاصرة قرر رفض مشاركة حزب التجمع الوطني للاحرار.

اتباعو فهاد الحزب اعضاء المجلس الوطني كلهم ناضو غوتو وفرحو بالقرار. تصورو قرار ما كيعنيش حزبو بل حزب رئيسة الحكومة اللي عندو معاها علاقة نسوبية، =ولد عمو مزوج بابنت الباشا=.

الخبر طلع خاطئ ماشي صحيح. خبر فايك. واش ممكن شي حد يتيق فسياسي طلع كذبة كبيرة بحال هادي.

من حق حزب الاستقلال يفرح بابعاد الاحرار من الحكومة حيت غادي يربح فالتفاوض وياخذ وزارات كثر. غادي الاستقلال يولي القوة السياسية الثانية ب65 مقعد ويخليه يتبورد على التراكتور. هاد التوجه اللي كيسوقو ليه صحاب البام بادخال احزاب الكتلة فهاد الحكومة هي فالحقيقة هدية واعرة لهاد السياسي اللي كيروج الفايك، نسيب عباس الفاسي =مزوج ببنتو=.

دابا واش ممكن يتعطى حجم كبير لهاد النوع من السياسيين؟ شكون عرف؟ يمكن المرحلة اليوم ديال بحالو