بنت عندها 17 عام تهزات للسبيطار الحسني فكازا.. بعدما شكو أن فيها أعراض ’’الخناق‘‘ .
أميمة عطية – كود كازا ///
عرف السبيطار الإقليمي الحسني فكازا البارح الخميس فالليل حالة استنفار، ملًُي استقبل بنت عندها 17 عام، بعدما وصلات وهي كتعاني من أعراض خلات الطاقم الطبي يشك فإصابتها بمرض الخناق المعروف بـ“الدفتيريا‘‘.
وحسب المعطيات المتوفرة، البنت كانت كتعاني من التهاب حاد فالحنجرة، صعوبة فالتنفس وارتفاع فالحرارة، وهو الشي اللي خلا الطاقم الطبي يتعامل مع الحالة وفق الإجراءات الصحية الخاصة بالأمراض المعدية.
البنت تخضعات للعزل الطبي، وتاخدات منها عينات مخبرية وترسلات للتحليل، فانتظار النتائج اللي غادي تحسم واش كاينة فعلاً إصابة بالدفتيريا من عدمها.
وبالتزامن مع هاد الإجراءات، تنظمات حركة الولوج للسبيطار وتشددات المراقبة فالمداخل، كإجراء احترازي للحد من أي احتمال لانتقال العدوى.
