كود – كازا //

معطيات دولية جديدة كتقدم قراءة رقمية لمسار نجاعة الحكومة المغربية فالسنوات الأخيرة، بعدما سجل المؤشر طلوع متواصل فالولاية الحكومية الحالية بقيادة عزيز أخنوش، ولي كتحط أداء الحكومة فمقارنة مباشرة مع المستويات اللي تسجلات فالحكومات السابقة.

حسب معطيات Worldwide Governance Indicators 2026، طلع مؤشر نجاعة الحكومة فالمغرب من 48.54 نقطة ف 2015، لـ51.72 سنة 2020، قبل ما يوصل لـ55.96 نقطة سنة 2025.

وهاد المؤشر كيركز على جوانب مرتبطة بقدرة الحكومة على تقديم الخدمات العمومية، وجودة الإدارة، وصياغة وتنفيذ السياسات العمومية، إضافة إلى مصداقية القرارات الحكومية. والبنك الدولي كيبني هاد المعطيات على 35 مصدرا، من بينها استطلاعات الأسر والمقاولات وتقييمات الخبراء، وكيغطي أكثر من 200 اقتصاد حول العالم.

وبالتالي، فالارتفاع المسجل بين 2020 و2025 كيعطي مؤشرا رقميا على تحسن التصورات المرتبطة بنجاعة الحكومة فهاد الوقيتة، اللي تزامنات أساسا مع الولاية الحكومية الحالية بقيادة عزيز أخنوش، اللي تولات المسؤولية فـ2021.

وبهاد المعنى، الرقم الجديد كيوفر واحد المقياس الدولي اللي يمكن يرجع ليه النقاش على أداء الحكومات المغربية خصوصا وأن المغرب مقبل على ولاية حكومية ديال كيترأسها البام اللي غادي يلقا قدامو أداء حكومي وانجازات ومؤشرات طالعة كتلزم عليه يهز الريتم إلا عندو شي سوفل.