أميمة عطية – كود كازا ///

غادي يناقش مجلس جماعة الدار البيضاء، خلال الدورة العادية لشهر أكتوبر 2026، ملف مرتبط بعقد التدبير المفوض لقطاع النظافة بعمالة مقاطعات سيدي البرنوصي، بما فيها مقاطعة سيدي مومن.

وحسب معطيات لمتوفرة ، كيتعلق الأمر بدراسة والتصويت على مشروع الملحق التعديلي رقم 1 لعقد التدبير المفوض لقطاع النظافة رقم 06/2019، الخاص بعمالة مقاطعات سيدي البرنوصي.

وكيجي هاد الملف فإطار النقاش المتواصل حول تدبير قطاع النظافة فكازا، والرفع من مستوى الخدمات المقدمة للساكنة، خصوصا فظل عدد من الاختلالات اللي كتسجل فعدد من الأحياء.

وبالتوازي مع هاد الملف اللي غادي يكون ضمن جدول أعمال دورة أكتوبر، كاينة تحركات على مستوى عدد من مقاطعات المدينة لمواكبة تدبير القطاع، خصوصا مع دخول الشركات المفوض لها حديثا مرحلة جديدة من تدبير النظافة.

وحسب معلومات توصلات به “ كود” ، عدد من المقاطعات بداو يعقدو لقاءات تنسيقية مع الشركات المكلفة بالنظافة، بهدف مناقشة الصعوبات اللي رافقت انطلاق العقود الجديدة، ورصد النواقص المسجلة ميدانيا، والبحث على حلول للتدخل بشكل أسرع وتحسين الخدمات.

وتناقش فهاد اللقاء عدد من الإكراهات المرتبطة بجمع زبل والتدخلات الميدانية، مع التأكيد على ضرورة تكثيف الجهود والرفع من وتيرة التدخلات، خصوصا فالنقط اللي كتسجل فيها تراكمات واختلالات.

وكيعكس هاد التحرك، بالتزامن مع مناقشة الملحق التعديلي ديال عقد النظافة فمجلس الجماعة، لي حضور ملف النظافة فيه مهم وضمن الملفات اللي كتهم التدبير اليومي لكازا