بسباب اللحايا والمتطرفين أمراض معدية كانت انقرضت في المغرب هاهي رجعات بسباب الحملة لي دايرين ضد التلقيح، واي حاجة عندها علاقة بالدولة وفي نفس المنطقة محيط أگادير فيه نتاشرربوحمرون ودابا مرض الديفتيريا الخطير .
محمد سقراط-كود///
بسباب اللحايا والمتطرفين أمراض معدية كانت انقرضت في المغرب هاهي رجعات بسباب الحملة لي دايرين ضد التلقيح، واي حاجة عندها علاقة بالدولة وفي نفس المنطقة محيط أگادير فيه نتاشرربوحمرون ودابا مرض الديفتيريا الخطير، وراه أصبح جليا للعالم أن محيط أكادير كيعرف واحد من اكبر التجمعات الإسلامية المتشددة، طفلات كيلعبوا بالححاب، النقاب تقريبا رجع هو اللباس التقليدي تم، سبقلينا في گود نبهنا لهاد القضية ولكن للأسف الدولة سواء العميقة أو الضحلة مكتاخدش هاد الأمر بجدية، ومخليا اللحايا والسلفيين يتبوردو كيف بغاو، راه كاين تقصير كبير من طرف مديري المدارس، أي واحد مملقحش ممنوع يدخل للمدرسة ويتغرموا واليديه لأنه على كل شهر كيدوزوه بلا مايلقحوا ولادهم، لأنهم بهذا كيهددو حياة المغاربة، او يتجمعوا ويتدارو في معسكرات معزولة صحيا باش مايعاديوش باقي المغاربة.
التلقيح ساهم في إطالة عمر البشرية والقضاء على عدة أمراض خطيرة، راه غير في التسعينات قرى معايا طفل مصاب بشلل الأطفال وكان للأسف من واحد من آخر الحالات المسجلة، من بعد تم القضاء على المرض نهائيا في المغرب بفضل التلقيح، حاليا وبالخصوص من بعد كورونا، ساهم التشكيك في لقاح كوفيد في انتشار مقاطعة التلقيح، وهادشي كيعانيو منو حتى الدول الغنية لي فيها هامش الحرية كبير ومقدس، ولكن تم الفرد كيتحمل المسؤولية ديال الغلط ديالو، بينما هنا بنادم كيبغي يتمرد على الدولة ولكن غير تطلع ليه السخانة يهبط يجري لسبيطار الدولة يغوت وافين الأطباء مخليين المغاربة كيموتوا، واش هادي بلاد هادي.
مكنظنش أنها صدفة يبانو جوج بؤر ديال أمراض منقرضة في نفس المنطقة مرتبطة بمقاطعة التلقيح، وا الدولة هادوك الاحزمة ديال الفقر ودعاة التطرف لي حالين القنوات ومطلوقين تم راه غادي تخرج من عندهم شي كارثة شي نهار، يكفي أنه داك الجهة كيتكرروا فيها هجومات عنيفة من طرف مختلين عقليا بلباس سلفي، ودابا هاهوما مقاطعين التلقيح ومنهم لي مقاطع المدارس، راه خاص تغلغل توعوي ومحاربة لكل اشكال ومظاهر التطرف وخصوصا في الفضاء العام، أو غادي يبان شي عجب من تم لا قبل لنا به.
