الرباطـ هناء ابو علي //

تزادت بنت الباشا فاطمة الزهراء المنصوري، التي عينها سيدنا محمد السادس، اليوم الثلاثاء، رئيسة للحكومة، ف3 يناير 1976 بمراكش.

تقلدات منصب وزيرة إعداد التراب الوطني والتعمير والإسكان وسياسة المدينة فحكومة عزيز اخنوش (2021 – 2026). عندها شهادة فالقانون الأنغلوساكسوني من جامعة بايس الأمريكية، وعندها دبلوم الدراسات العليا فقانون عقود الأعمال من جامعة مونبليي، وليصانص فالقانون الخاص من جامعة محمد الخامس الرباط.

والمنصوري محامية بهيئة المحامين بمراكش منذ 22 مارس 2005، كتقول متخصصة فالقانون العقاري.

بدات السياسة مع “حركة لكل الديمقراطيين” سنة 2007، ومع البام ف (2008). وما بين 2009 و2015، كانت عمدة مراكش اللي رجعات لهاد المنصب ما بين 21 و27.

دخلات البرلمان ف 2011 إلى 2016. وترأسا المجلس الوطني لحزب الأصالة والمعاصرة (2015 – 2024)، وتعاود نتخابها نائبة برلمانية (2016 – 2021).

بعد فشل الحزب فانتخاب امين عام ف2024 تخلق ما يعرف بالقيادة الثلاثية وتعينات منسقة ليها

مزوجة بشي محامي اسمو بركة من عائلة نزار بركة امين عام حزب الاستقلال وعندها جوجت لبنات من زوجها الاول اللي توفى.

ف2024 رسلات ل”كود” مقال رد فيه على ما تنشر واكدات فيه باللي هي بنت الباشا. هادي اشهر زادت لقب اخر باش قالت راها “بنت الصالحين”.

هاد السياسية ماشي حداثية كيف قدم الحزب ديال البام راسو. بنت الباشا و بنت الصالحين كتبين السلوك المحافظ ديالها. كتدعي العصرنة وهي قيادية كتعتامد على إرث “التقليدانية” والوجاهة العائلية الموروثة.

زيد عليها اننا عمرنا شفنا المنصوري كتهضر على خطوط فكرية حداثية حقيقية أو كدافع على قضايا إصلاحية تنويرية كيف كينص عليها البرنامج التأسيسي للحزب، وإنما كتفضل ديما تخبا مورا التوازنات المحافظة للأعيان باش ضمن البقاء السياسي عكس وهبي لي واقف حسكة فوجه الظلاميين.

ما عمر هاد السيدة دافعات على قضية كتهم الوجه الحداثي للحزب. دافعات كمداعية اولا وناضلات كبرلمانية. فهاد السنة اسمها ارتابط بعقار الباشا لكلاوي كيف نشر “لوديسك” وقبلها كانت فضيحة تاسلطانت من خلال ما نشر اظهر ان مخطط النهيئة للمدينة تم تعديلو لصالح هاد العقار.

العقار كان ملك لعائلة بنت الباشا وكانت هدرة على اعفاء ضريبي وصل ل380 مليون سنتيم كيف جا فتحقيقات صحافية وتسلمات 144 ترخيص لمجموعات سكنية فغياب شبكات الواد الحار، و114 مشروع بلا ما صالح للشرب، والترخيص لمشروع ديال 153 فيلا فوق “شعبة مائية طبيعية” و تحريف المجرى ديالها، وخا هي خرجات كذبات هاد التحقيقات الصحافية وهددات بمتابعة ناشريها امام القضاء

دابا دخلات لمرحلة اخرى وولات رئيسة للحكومة مكلفة بانشائها. هاد الشي اللي وقع ليها غادي يتبعها طيلة استوزارها