كود سطات//

من بعد ما نشرت «كود» مقالها على شنو تثار بخصوص شبهات اختلاس الفلوس فالأكاديمية الجهوية للتربية والتكوين ديال جهة الدار البيضاء–سطات، بدات التطورات كتتسارع داخل الأكاديمية، وسط تساؤلات على طبيعة الاختلالات المفترضة، والجهات المعنية بها، والمسؤوليات المرتبطة بهاد الملف، فانتظار شنو غادي تكشف عليه عمليات الافتحاص والتحقيقات الرسمية .

وحسب المعطيات اللي توصلات بها «كود»، سادت خلال الساعات الأخيرة حالة ديال الترقب داخل دواليب الأكاديمية، بعدما حاول المسؤولون ديالها يبعدو هاد الشبهة على الأكاديمية، ويوجهوها نحو المديريات الإقليمية التابعة لها. وفهاد السياق، حلات البارح لجان جهوية تابعة للمفتشية العامة ببعض المديريات الإقليمية، اللي تفاجؤوا بهاد الإجراءات الرقابية ..

وقالت مصادر مطلعة لـ«كود» إن هاد التطورات خلفات حالة ديال الاستغراب داخل بعض المديريات الإقليمية، خصوصا وأن الأمر كيتعلق بملف كتحوم حوله شبهات اختلاس مالي داخل الأكاديمية، وماشي غير ملاحظات أو اختلالات إدارية عادية ..

وأمام هاد الوضع المقلق والغامض، خاص الوزارة الوصية تدخل بشكل مباشر فهاد الملف، وتحط حدا لجميع التأويلات اللي ممكن تحط بعض المديريات الإقليمية فموقف حرج، خصوصا وأن الأمر كيتعلق بشبهة اختلاس أموال، وماشي غير خروقات إدارية عادية.

وبالتالي، خاص تطبيق مبدأ ربط المسؤولية بالمحاسبة، عبر التوجه مباشرة لمربط الفرس، أي للمكان اللي وقعات فيه هاد الاختلالات، وتحديد المسؤولين المباشرين المعنيين بها. ط