وفهاد السياق ، كال جمال العسري، الأمين العام للحزب الاشتراكي الموحد والمنسقين لـ“تحالف اليسار”، لـ“كود” ، أن تحالف بالنسبة ليهم ماشي تجميع المقاعد، وإنما الدفاع على مشروع سياسي كيوصل للملكية البرلمانية والسيادة الشعبية والوطنية.

وفتصريح خاص لـ“كود”، كال العسري إن “تحالف اليسار” غادي يتوجه للمعارضة، وما غاديش يتحالف مع التقدم والاشتراكية، موضحا أن التحالف مكيقلبش على تحالفات انتخابية ولكن كيشوف التحالفات السياسية.

وكال لعسري ، إن التحالف كيجند للقوى اليسارية اللي غادي تدافع على مشروع سياسي واضح، ومن بين مرتكزاتو إقامة السيادة الشعبية، مع إصلاحات سياسية ودستورية، وصولا، إلى الملكية البرلمانية، فين يسود الملك وما يحكمش.

وبهاد المعنى، العسري كيشدد أن الاختلاف ماشي غير فحسابات التحالف داخل البرلمان، وإنما مرتبط بطبيعة المشروع السياسي اللي كيدافع عليه “تحالف اليسار”، واللي كيشوف أن أي تقارب خاصو يكون مبني على مواقف ومشروع مشترك.

وزاد العسري وأكد فجوابو ، على أن المشروع ديال التحالف كيرتبط حتا بـإقامة السيادة الوطنية، واللي فيها استرجاع الأراضي لمحتلة، وعلى رأسها سبتة ومليلية وجزر الجعفرية، وطي ملف الصحراء نهائيا.

وفنفس التصريح، كال العسري إن إسقاط التطبيع داخل حتى هو ضمن المواقف اللي كيدافع عليها التحالف.

وأكد أن “تحالف اليسار” ما يمكنش يكون غير من البرلمان، وإنما خاصو يكون مرتبط بالنضالات والجماهير، وأن أي تنظيم يساري قابل بهاد المشروع والمواقف مرحبا به.

أما بخصوص البرلمان، منسق تحالف اليسار إن البرلمانيين الثمانية غادي يكونو داخل مجلس النواب صوت ديال الاحتجاجات والأصوات ومطالب الشارع، وأن هاد المطالب غادي توصل للمؤسسة التشريعية.

وشدد العسري على أن النواب ديال التحالف غادي ينقلو هاد النضالات والمطالب “بأمانة وصدق”، باش يبقى الحضور داخل البرلمان مرتبطا، حسب تصريحو، بالنضال الحقيقي خارج المؤسسة.