جمال العسري لـ“كود”: تزوير تابت فـ“مجزرة” الانتخابات فطنجة وهادشي خطير.. كيفاش عمدة رئيس للمنظمة العالمية للمدن والحكومات المحلية يدخل فهاد الملف؟.. كنطالبو بتحقيق مع السلطة المحلية وإسقاط جوج كراسا ديال “البام” فالبرلمان تماك .

مصدر الصورة

أميمة عطية – كود كازا ///

من بعدما دخل ملف وراق التصويت اللي تلقاو فمؤسسة القدس بمنطقة كسبراطا فطنجة لمرحلة جديدة، و تداول معطيات على صدور مذكرة بحث دولية فحق عمدة طنجة منير الليموري، فظل استمرار البحث القضائي فهاد القضية وتوقيف عدد من المشتبه فيهم.

تاصلات “كود” بجمال العسري، الأمين العام للحزب الاشتراكي الموحد، وفي الوقت نفسو واحد من القادة والمنسقين الرئيسيين لـ“تحالف اليسار”، اللي كال إن التحالف غادي يفتح تحقيق فالمعطيات المرتبطة بالاقتراع والفرز بدوائر فطنجة، ومكناس، وبولمان والدار البيضاء.

وفهاد السياق، وفـتصريح لـ“كود”، كال العسري إن التحالف باقي ما توصلش بالمحاضر كاملة، ولكن غادي يفتح تحقيق فهاد الملفات، معتبرا أن اللي وقع فطنجة “كارثة” و“مجزرة”، وكال: “تزوير ثابت فالأوراق الانتخابية فطنجة ”.

وبخصوص مذكرة البحث الدولية المتداولة فحق منير الليموري، كال العسري إن هاد التطور كيطرح أسئلة كبيرة على المسؤوليات، خصوصا وأن الأمر كيتعلق بعمدة طنجة، و“طنجة وما أدراك ما طنجة”، وبمسؤول كيشتغل فعدد من المناصب وكيشارك فاستقبال رؤساء وضيوف وحكومات.

وزاد كال العسري إن الليموري ماشي غير عمدة طنجة، وإنما كيشغل منصب رئيس الجمعية المغربية لرؤساء مجالس الجماعات ، وكيمثل رؤساء مجالس الجماعات قدام الحكومة والمؤسسات كيفاش اساهم فتزوير ؟

وشار العسري إلى أن الليموري انتخب، حتا فمؤتمر عالمي انعقد فطنجة فشهر يونيو، رئيس للمنظمة العالمية للمدن والحكومات المحلية، معتبرا أن هاد المسؤوليات المتعددة كتخلي، الملف أكثر خطورة، خصوصا بالنظر للمناصب والمهام اللي كيشغلها.

وشدد الأمين العام للحزب الاشتراكي الموحد على أن التحالف ما كيطالبش غير بالتحقيق مع العمدة، وإنما بفتح البحث حتا مع السلطة المحلية، سواء المنتخبة ولا المعينة، باش يتحدد شكون مسؤول على شنو وكيفاش وقعات هاد القضية.

وكال العسري إن هاد الملف ما خاصوش يتحصر فشخص واحد، وإنما خاص البحث يشمل جميع المسؤوليات المحتملة، السياسية أو الانتخابية أو الإدارية، مؤكدا أن كل مسؤول خاصو يخضع للتحقيق.

وبنسبة متائج ديال الانتخابات فطنجة، كال العسري إن تحالف اليسار غادي كيطالب، بإسقاط جوج مقاعد برلمانية ديال “البام” فطنجة، واحد من الدائرة المحلية وواحد من اللائحة الجهوية، وكال ان تزوير تابت فحق العمدة ومكاينش فيه الشك .

وأكد العسري أن التحالف باقي ما توصلش بجميع المحاضر، وهادشي كيخليهم يطرح تساؤلات وأنهم غادي يفتحو حتا تحقيق فدوائر فطنجة ومكناس وبولمان والدار البيضاء.