واش ممكن سيدنا يعين بنت الباشا وهي مورطة ففضيحة اصوات طنجة ؟. فوزي مطلعنا 5 عالميا وما جاش لطنجة وهي شوهات الانتخابات. هي اللي عينات الليموري مدير حملة ودافعات عليه ف"العمدة مون بيبي" وطلبات تجي لتجمع فعاصمة البوغاز بلا لقجع وبطلب منو واخا ناس البام تماك ما بغاوش =فيديو= .

مصدر الصورة

هناء ابو علي كود – طنجة //

البارح ف”كود” قلنا ان سيدنا وانطلاقا من تعيينات سابقة فمنصب رئيس الحكومة من المتوقع يعين بنت الفاشا فاطمة الزهراء المنصوري رئيسة للحكومة. غير المستجد ديال البارح فطنجة يقدر يقلب كلشي.

اش وقع فطنجة؟ كلشي بدا نهار لاربعا 23 شتنبر فمدرستي القدس وعباس السبتي بكاسا باراطا مقاطعة السواني بعاصمة البوغاز فالصباح. مراقب حزب الديموقراطيون الجدد لقى جوج صيطان عامرين باوراق انتخابية وفيهم تصويت على البام. حيح جات السلطات والبوليس. فاللول البام خرج كيقول فبيان حتى لعشية كيقول باللي هادا استهداف. مشى وكيل اللائحة ديال البام فطنجة عبد اللطيف الغلبزوري ومدير حملتو اللي هو الليموري منير للبوليس باش يحطو شكاية. كان خاصهم يحطوها عند الوكيل. ماشي مشكل. فاللول تشد واحد. بعدها وصل عدد الموقوفين فهاد القضية ل5. البارح نزلات مذكرة بحث كتهم العمدة البامي الليموري اللي خوا لمدينة وطار لاسبانيا لخميس بعد الظهر على باب سبتة كيف قالت وسائل اعلام محلية.

لكن اش لاح بنت الباشا فاطمة الزهراء المنصوري لهاد الشي؟ هي منسقة القيادة الثلاثية. اللا. عندها علاقة كبيرة. اولا هي اللي دافعات على هاد الليموري اللي ما كان يعرفو حد وحطاتو عمدة فالمدينة. ثانيا بنت الباشا اللي دعماتو ودافعات عليه بزاف باش خرجات فضيحة العمدة مون بيبي اللي هزات طنجة. تسجيلات واويوات كلها اتهامات وخنز. السي لليموري ما وقع ليه والو.

ثالثا: باش جا وقت التزكيات، بنت الباشا مع كورال رئيس جهة مراكش والقيادي فالبام اللي فرضو يكون العمدة مدير الحملة. مدير حملة وكيل اللائحة اللي هو الامين العام الجهوي للبام.

اكثر من هادا، وهادا رابعا، بنت الباشا اللي طلبات تجي دير تجمع انتخابي لدعم وكيل لائحة طنجة. كان هاد الشي نهار 16 شتنبر. جات واخا ناس البام، حسب مصادر “كود”، كانو متحفظين. المبرر ساهل. كاين 5 مقاعد. البام جايب مقعد ديالو بلا ما تجي يا المنصوري. بنت الباشا كان عندها حسابات اخرى. دعم الليموري.

خامسا. لفضيحة وقعات والعمدة الليموري هرب وبنت الباشا لحد هاد الساعة ما خرجات حتى شي بيان. غير بلعاني كيف دارو مع لملايري مول لفروماج باش تورط وحيدو ليه الباسبور. والو ساكتة.

خامسا: راه هاد الهارب الليموري تم انتخابو فمراكش رئيسا للجمعية المغربية لرؤساء مجالس الجماعات ف19 مارس 2022 بدعم كبير من بنت الباشا. بل هي اللي تنازلات ليه على المنصب

بنت الباشا عندها دور فهاد الشي. عندها مسؤولية. البارح باش كانت اخبار هروب العمدة من المغرب ومذكرة البحث عليه من قبل القضاء، كان مغرب فوزي لقجع يطلع بالبلاد. وصلنا فالكورة للرتبة 5 عالميا. فوزي ما حضرش لهاداك التجمع الانتخابي ديال 16 تشنبر بطنجة. فوزي كيطلعنا عالميا وبنت الباشا كتشوهنا دوليا بهاد القضية.

تعيينها رئيسة الحكومة بهاد لفضيحة وزيد عليها فضيحتي تاسلطانت وعقار الباشا لكلاوي غادي يبعدها كثر عن رئاسة الحكومة.

ملاحظة: كود تنشر فيديو بنت الباشا فتجمع 16 شتنبر بطنجة. وسمعو اش كانت كتقول وحداها الليموري اللي ديما كدافع عليه