الحزب اللي ربح انتخابات البارح 23 شتنبر التشريعية هو حزب العدالة والتنمية. حزب طاح ف2021 وجاب 12 مقعد وغير بالقاسم المشترك تقريبا، قدر يوصل حسب النتائج المؤقتة اللي علن عليها وزير الداخلية هاد الصباح، 54 مقعد. اكثر المتفائلين ما كانوش يظنو الحزب يربح كثر من 30 مقعد. الحزب ماشي غير ربح ولكن حيح فكازا مثلا جاب 10 المقاعد وجا فالرتبة الاولى فتقريبا كاع الدوائر وبفارق كبير بزاف على منافسيه.

لو البي جي دي قدر يربح مقاعد فالعالم القروي كون دا الانتخابات. سياسيا كانت عودة قوية. عبد الاله بنكيران الامين العام للحزب بين على قدرات قوية بزاف فالتواصل باش يدير هاد الريمونطادا. حتى الصحة والامكانيات ما عاوناتوش، كون كانت عندو طيارة كيف 2016 ومازال صحيا قادر يسافر بزاف كون هاد 54 طلعات بزاف وعلاش اللا الرتبة الاولى.
كاين عامل اخر لعب دور باش يوقف هاد المد ديال البي جي دي، وهو الدخول فالدقيقة 90 لفوزي لقجع للبام. ما كانش هاد الدخول مربح للتراكتور باش يجي الاول ب97 مقعد بل لعب دور كبير باش يفراني صحاب بنكيران ويوقف الانتشار ديالهم.

فالسياسة ما فيهاش كون وتصورو، ولكن مع ذلك نشوفو هاد السيناريو كون بقى. البام ببنت الباشا وفضايح تاسلطانت كايت وبعدها ورثها فعقار ديال الباشا لكلاوي وزيد عليهم مهدي بنسعيد اللي عطى مارشيات عمومية غير لشركات محدودة بزاف طيلة ولايتو الحكومية مع هادوك اللي دايرين بيه وعدد من قادة البام اللي كل واحد وبراكتو من لفضايح. حزب تشدو فيه قياديين بتهمة المخدرات… كون دخل البام بهاد لفضايح للانتخابات كان ماشي غير غادي يتراجع، بل قيادي من المؤسسين قال ل”كود” باللي حتى الرتبة الرابعة يقدر ما يجيبهاش.

اذن دخول فوزي لقجع بدل كلشي فهاد الحزب، كان وجهو المشرق فالتواصل. دار كثر من 12 الف كيلومتر فجولات ولقاءات حزبية فكاع المغرب. حيد شوية من الصورة الخايبة اللي عند لمغاربة على هاد الحزب.

دابا النتائج خرجات فانتظار يقبلوها كاع الاحزاب خاصة العدالة والتنيمة، وبعدها تخرج النتائج النهائية للي ما غاديش يكون فيها تأثير على شكون جا فالمرتبة الاولى واللي منو حسب الدستور غادي يكلف سيدنا رئيس او رئيسة الحكومة باش يدير الاغلبية ديالو ويشكلها.

دابا راه ما كاينش غير تشكيل الحكومة كاين حتى شكون غادي يبقى فالمعارضة. ايلى كانت بنت الباشا رئيسة الحكومة اكيد غادية تشكلها مع نسيبها الاستقلالي نزار بركة اللي عطاتو الطاشرون اللي شرا من عندها ارض تسلطانت وترشح باسمو فشي دائرة من دوائر مراكش وتزيد احزاب بحال الحركة الشعبية والاتحاد الدستوري وشي احزاب اخرى. طبعا غادية تجيب شي بروفايلات مقتولين من البام للحكومة ويديرو لوزيعة. النتيجة المنطقية. البي جي دي غادي يتبورد فالمعارضة ومعاه 8 مقاعد ديال تحالف اليسار وضعف شخصية بنت الباشا ولفضايح اللي تابعاها وعدم قدرتها على اجتماعات طويلة وضعفها فمواكبة ومتابعة مشاريع كبيرة كلها غادي يفتح الطريق باش العدالة والتنمية بعد عام يهيمن على كاع المدن. كانت انتخابات بلدية وغادي يربح اكبر المدن مع حكومة بنت الباشا.

خاص رئيس حكومة قادر صحيا يخدم. قادر يدير السياسة ويفهم فالسياسات العمومية. البروفيل الوحيد عندهم هو فوزي لقجع اللي نقدهم من هزيمة كبيرة فانتخابات البارح.

دابا رئيس الدولة هو اللي غادي يقرر شكون يشكل الحكومة. رئيس الدولة كيسهر على السير العادي للمؤسسات. هاد السير العادي محتاج سياسي قادر تواصليا ومعرفيا وصحيا وسياسيا يدبر الحكومة. شروط ما كايناش فبنت الباشا

سياسة مغربية

المصدر: كود

الصفحة الرئيسية

أخبار ذات صلة

مالي تجدد دعم الحكم الذاتي بالصحراء

من تصدر الانتخابات إلى تشكيل الحكومة .. "البام" أمام امتحان التحالفات

إقرأ أيضا

رابطة أنصار الحكم الذاتي: الانتخابات بالصحراء ممارسة لتقرير المصير ورسالة للانتقال إلى الحل السلمي

تركيا ترسل رئيس الأركان إلى السعودية لحضور اجتماع عاجل بشأن اتفاقية مكة للدفاع