الانتخابات في التسعينات كانت بحال اليوم العالمي للفساد، أحياء كاملة ديال البناء العشوائي في طنجة بانت في الانتخابات، أنا كنت ساكن في واحد منها، والبعض منها تسمى على مرشحين بحال حومة الأربعين جنب مغوغة، وكان اليوم العالمي للحريگ والهجرة السرية وقوارب الموت داك الساعة، ولتهريب الحشيش سواء لأوروبا او غير في المغرب، وطبعا كانت الانتخابات كتعرف حروب بين الأحياء بالسيوفة والجناوى وكل حومة كتلقاها بقعة جغرافية مقتطعة لمرشح معين وماشي لحزب من غير شي مناطق، وبصفة عامة كان شبه اليوم العالمي لهرگاوة يمارسون فسادهم تحت أعين السلطة والدولة وهانية.

هاد العام عشنا أبرد حملة انتخابية ربما في تاريخ المغرب، تلعبات أغلبها عبر الفيديوات وفي وسائل التواصل وطبعا عبر مهرجانات خطابية وحضور مباشر مع الناخبين بالطريقة التقليدية، ولكن عموما بلا تباين حقيقي او فرق كبير بين المتنافسين، الانتخابات لي قبل صوت على الأحرار أنا وبزاف ديال الناس حيت طلع لينا العدالة والتنمية فراسنا، الغاية اللولة من التصويت حققتها وهي ميطلعش العدالة والتنمية، ولكن في نفس الوقت لقيت راسي مصوت على أفسد منتخبين وأضعفهم، الفايق راه في الحبس وكان رمز من رموز الفساد الكبيرة في البلاد، والبقالي العمدة راه اضعف عمدة داز ربما في تاريخ فاس، حتى تولي افضل اليزمي عليه غير حيت كيقاد جمل مفيدة، هاد العام الخيار بين جوج أطياف متشابهة تقريبا بزاف منهم كينتاقلوا من حزب لآخر بلا حتى هوية سياسية او مرجع، بجوجهم كيتنافسوا شكون فيهم يطبق الخطة دسيدنا حسن من لاخر، وفي الاخر كتلقى راسك كتصوت بحال أيها شيباني أمي لأن الخيارات المطروحة أصلا ممحتاجاش القراية او الذكاء باش تختار بيناتها.

بالنسبة ليا أهم حاجة في هاد الانتخابات هي أنها مابقاتش نهار ديال الفساد والبناء العشوائي والهجرة الجماعية وتهريب المخدرات والمقاتلات بين المنتخبين، غير أنها تنقات من هاد مظاهر التخلف راه بداية مزيانة لطريق نحو ديمقراطية حقيقية، حاليا بقى تسهيل الشروط البيروقراطية لتكوين أحزاب جديدة بمرجعيات مختلفة، وعلاش لا حتى أحزاب جهوية بحال لي كاين في العديد من الديمقراطيات الحقيقية، أحزاب مناطقية كترافع على المنطقة ومكونة من ساكنتها وهمها الأول الدفاع عليها، بحال لي كاين في الصبليون وعدة دول أوروبية أخرى، كتلقى أحزاب جهوية عندها حضور كبير وممثل حقيقي للساكنة والجهة، راه واخا تكون نسبة المشاركة قليلة هاد المرة، ولكن كاين إشارات على أن بنادم وعى وبغى تغيير حقيقي وكذلك الدولة لي خاصها تستاجب لهاد التغيير، العملية الانتخابية حاليا غالب عليها طابع التمانينات فيها ريحة الغمولية بيها بأحزابها، خاص تجدد بما يتماشى مع هاد الجيل، لأنه في مكاتب الاقتراع راه كاين غير الشياب والكبار في العمر كاين غياب شبه تام للشباب، بأنها انتخابات مملة لا جديد فيها سوى خلوها من الفساد وحتى السياسية.