وفد مريكاني جا للمغرب باش يراقب الانتخابات فالداخلة والعيون .

مصدر الصورة

أميمة عطية – كود كازا ///

علنت سفارة المملكة المغربية فالولايات المتحدة الأمريكية وصول وفد تابع للمعهد الجمهوري الدولي (IRI) للمغرب، باش يلاحظ الانتخابات التشريعية المقرر تكون غدا الأربعاء 23 شتنبر، فخطوة كتدخل ضمن استمرار تعزيز العلاقات المغربية الأمريكية.

الوفد كيرأسوه بشكل مشترك ديفيد شينكر، مساعد وزير الخارجية الأمريكي السابق، وتامي لونغربرغر، عضو مجلس إدارة المعهد الجمهوري الدولي، وغادي يخدم على نشر ملاحظين فجهتي الداخلة وادي الذهب والعيون الساقية الحمراء لمواكبة الاستحقاق الانتخابي.

وفهاد السياق كالت، السفارة المغربية فواشنطن إن وصول وفد المعهد الجمهوري الدولي لملاحظة الانتخابات كيزيد بُعد واحد آخر للعلاقات المغربية الأمريكية، وكيعكس استمرار التعاون والروابط بين البلدين فعدد من المجالات.

وفهاد الإطار، بلادنا على موعد غدا الأربعاء 23 شتنبر باش المغاربة اصوتو واتحدد ليهم مسار حكومي جديد وقرارات جديدة كتهم مستقبلهم على مدى الخمسنين لي جايا، بحيت غادي يمشيو لمراكز الاقتراع باش يختارو أعضاء مجلس النواب، فانتخابات تشريعية كتشارك فيها 28 هيئة سياسية، وسط منافسة بين 7288 مرشح ومرشحة موزعين على 1850 لائحة انتخابية.

وللتذكير فقط، وحسب المعطيات لي كانت نشراتها وزارة الداخلية، كاينة 1615 لائحة فالدوائر المحلية، كتضم 5505 مرشحين، مقابل 235 لائحة فالدوائر الجهوية، فيها 1783 مرشحة، لشغل المقاعد المخصصة لهاد الدوائر.

وحسب نفس المصدر، مجلس النواب فيه 395 مقعد، منها 305 كيتنتاخبو على مستوى 92 دائرة انتخابية محلية، و90 نائب كيتنتاخبو ضمن 12 دائرة انتخابية جهوية.

ومن بين الأرقام اللي كتبرز فهاد الانتخابات، عدد المرشحات اللي وصل لـ2658، أي حوالي 36.5 فالمية من مجموع الترشيحات، من بينهم 875 امرأة كينافسو فالدوائر المحلية.

وكتضم لوائح المرشحين 227 عضو من أعضاء مجلس النواب الحالي، فحين قدمات أحزاب الأصالة والمعاصرة والاستقلال والتقدم والاشتراكية والعدالة والتنمية لوائح فمختلف الدوائر المحلية والجهوية، بينما التجمع الوطني للأحرار غطى جميع الدوائر المحلية و11 دائرة من أصل 12 جهوية.

وكانت الحملة الانتخابية بدات نهار 10 شتنبر، وغادي تسالي عند منتصف ليوم الثلاثاء 22 شتنبر، قبل ساعات من فتح مكاتب التصويت.

وحسب البوابة الرسمية للانتخابات، من المرتقب يبدا الإعلان عن النتائج الأولية ابتداء من 24 شتنبر، وسط استحقاق غادي يحدد تركيبة مجلس النواب المقبل ويدخل البلاد لمرحلة تشكيل الحكومة الجديدة.