قال فوزي لقجع، عضو المكتب السياسي لحزب الأصالة والمعاصرة والوزير المنتدب المكلف بالميزانية، بلي تنمية إقليم گرسيف كدوز من تقوية الربط ديالو بالساحل المتوسطي وميناء الناظور غرب المتوسط، عاد تطوير البنيات الصحية و حلول دايمة لمشكل الما.

لقجع، وفلقاء حزبي تنظم الثلاثاء 15 شتنبر بإقليم گرسيف، أكد أن الساحل المتوسطي كيشكل مجال مهم للتنمية بالنسبة للإقليم، كيف ما اعتبر أن توفير شروط انفتاح گرسيف على هاد المحور يقدر يوسع فرص الاستثمار، ويحسن الربط ديال الإقليم مع المراكز الاقتصادية الكبرى، خصوصاً مع الدينامية اللي مرتقب يعرفها ميناء الناظور غرب المتوسط.

عضو المكتب السياسي ديال الأصالة والمعاصرة وضح أن الميناء يقدر يكون رافعة اقتصادية يستافد منها گرسيف، كيف شار لأهمية تقوية الربط الطرقي بين الإقليم والناظور.

وفهاد السياق، علن فوزي على إنجاز طريق سيار كيربط المنطقة بهاد المحور المتوسطي، الشي لي يقدر يسهل حركة الأشخاص والسلعة ، ويقرب گرسيف كثر من المنشآت اللوجستيكية الجديدة.

وفقطاع الصحي، شدد لقجع على أن وضعية البنيات التحتية الصحية فگرسيف عندها أهمية استراتيجية عند حزب الأصالة والمعاصرة،كيف أكد على ضرورة تقوية العرض الصحي وتحسين الخدمات المقدمة للساكنة، بلي كيتماشى مع الحاجيا ديال الإقليم.

أما مشكل الما، لقجع طرح جوج طرق للتعامل معاه. الأول كيرتكز على تطوير السدود التلية وتعبئة الموارد المائية المتوفرة، والثاني كيتعلق بدراسة إمكانية ربط گرسيف بمحطة تحلية مياه البحر فالناظور.

وحسب لقجع، هاد الحلول تقدر تعاون فـتأمين حاجيات السكان من الما، وفنفس الوقت تدعم الأنشطة الاقتصادية والفلاحية فالمنطقة.

وربط فوزي لقجع تنزيل هاد الأوراش بثقة متبادلة بين المواطنين والفاعلين السياسيين، كيف ما أكد أن تحويل الالتزامات لمشاريع على أرض الواقع كيحتاج لدعم انتخابي كبير.

ودعا لقجع ساكنة گرسيف للمشاركة بكثافة فاقتراع 23 شتنبر، ومنح الثقة للبرنامج اللي كيقدمو حزب الأصالة والمعاصرة.