الزلزولي اختار المغرب وما خان بلادو ما عايرها. فرضات عليه فرقتو الصبليونية موقف. علاش درو عليه الحملة؟ .

مصدر الصورة

سعيد الشاوي گود سبور//

تعرض الدولي المغربي عبد الصمد الزلزولي لحملة تخوين من واحد الفئة ديال الجمهور، حيث دخل لابس توني فيه دعم لسبتة مع فرقتو ريال بتيس ضد فياريال فماتش البارح الاحد ضمن منافسات الصبليون.

قبل نعرفو شكون الزلزولي. تزاد وعاش فاسبانيا. دوز البارصا. اختار المغرب ضدا على لبلاد اللي تربى فيها.

عبد الصمد الزلزولي خرج ببلاغ وضح فيه الموقف ديالو من الصداع اللي واقع بسبب التوني اللي لبس مع ريال بتيس، وقال: “أولا بغيت نأكد واحد الحاجة مهمة، التوني اللي فيه ركز لسبتة ما عندو حتى شي عرض سياسي او فيه ازدراء للشعب المغربي”.

وكمل الزلزولي: “هذاك التوني فيه رسالة اجتماعية فيها دعم لسكان سبتة، كيفما كانت جنسياتهم، حيث كايدوزو بظروف صعيبة”.

اولا هذا التوضيح اللي دار عبد الصمد الزلزولي، كايبين ان التوني اللي لبس كان عندو غرض اجتماعي إنساني ماشي سياسي، وثاني حاجة راه الزلزولي لاعب محترف وعندو عقد مع فرقة، واي حاجة دارتها الفرقة خاصو يلتزم بها.

الغريب فهاد الحملة اللي دارت على عبد الصمد الزلزولي هي انها تجاوزت الحدود ووصلت المس بالجانب الشخصي للاعب والوطنية ديالو وكاين اللي طالب باش ما يبقاوش يعيطو له للمنتخب المغربي، وهذا الشي راه حماق وقلة عقل من فئة كاتفهم مفهوم الوطنية على حسب گانتها، اما الزلزولي راه بين ومن نهار تم الاستدعاء ديالو للمنتخب المغربي اول مرة على التفاني والحب ديالو لقميص المنتخب المغربي.

يمكن تآخذ عليه ديك هزة الصبع ما كانش يديرها. يمكن كان عليه يتصور بيه بلا مشاعر. ولكن راه فنادي فاشبيلية اللي العاصمة ديال الاندلس. هادو راه معصبين بزاف بزاف لكل ما هو اسباني. استغلو هاد الشي ديال سبتة المحتلة باش يزايدو.

ما خاصش تحملو لعاب بحال الزلزولي كثر من طاقتو. خاص مواكبتو. خاص تشرحو ليه الامور مزيان. اللي تزاد فالمغرب كيعتابر سبتة ومليلية مغربيتين. عافاكم سيرو عند لمغاربة اللي تزادو فاسبانيا وواليديهم ما مسيسينش وشوفو اش غاديين يقولو ليكم. تكايسو على الدري