فحملتهم الانتخابية بكازا. تحالف اليسار هبطو لمعاريف اقنعو لكزاويين ببرنماجهم .. ومنيب لـ“كود”: إلا نجحت فأنفا غادي نخدم على برامج اقتصادية واجتماعية فيها الدعم والتعليم فابور وندافع على البيضاويين سواء فالأغلبية ولا المعارضة (تصاور) .

أميمة عطية – كود كازا ///

نزلت نبيلة منيب، المرشحة بدائرة أنفا عن حزب الاشتراكي الموحد مع حزب تحالف اليسار، للشارع فكازا، البارح السبت 12 شتنبر، فإطار الحملة الانتخابية لاستحقاقات 23 شتنبر.

منيب انطلقت من مقر الحزب الاشتراكي الموحد، قبل ما تخرج مع أعضاء الحملة للقاء البيضاويين، وتوزيع البرنامج الانتخابي وشرح طريقة التصويت للناخبين.

واختارت منيب تبدا الجولة ديالها فالعشية حتا 10 ليل من منطقة المعاريف، واحد من الأحياء المعروفة فكازا، فين تلاقات مع عدد من المواطنين والمواطنات، وشرحات ليهم البرنامج الانتخابي ديال تحالف اليسار، والملفات اللي كيقترح يخدم عليها.

مصدر الصورة

“كود” هبطات مع نبيلة منيب للشارع، وشفنا بلًي التفاعل معها كان مختلف، المواطنين رحبو بيها وأكد بعضهم أنهم غادي يصوتو عليها، خصوصا وأن اسمها معروف عند عدد من البيضاويين، كبار وصغار.

ولكن فالمقابل، عبرو مواطنين آخرين على فقدان الثقة فالأحزاب السياسية والبرامج الانتخابية، وكالو ليها إنهم ما بقاش عندهم الرغبة فالتصويت، فمشهد كيعكس استمرار النقاش بخصوص العزوف الانتخابي والثقة فالمؤسسات والأحزاب.

وفهاد الدويرا لي دارت، دخلات منيب فحوار مباشر مع عدد من المواطنات، ومن بين النقاشات اللي وقعات، مواجهة مع مواطنة تساءلات على مدى قدرة المرشحين على تنفيذ الوعود الانتخابية.

مصدر الصورة

المواطنة خاطبت منيب بشكل مباشر، وسولاتها واش فعلا غادي تكون قادرة تدير داكشي اللي كتقول، خصوصا فالمجال الاقتصادي والاجتماعي والصحي، وهو السؤال اللي كيبقى حاضر عند عدد من الناخبين مع كل حملة انتخابية.

منيب جاوبات بأن البرنامج اللي كيقدموه ماشي مجرد وعود، وإنما كيتضمن تصورات وإجراءات اقتصادية واجتماعية، مؤكدة أنها فحالة نجاحها غادي تدافع على مصالح سكان أنفا، وتخدم على الملفات اللي كتهم المنطقة والمواطنين.

وفهاد السياق، وفتصريحها لـ“كود”، وضحات منيب أن ترشحها بدائرة أنفا كيدخل ضمن تحالف اليسار، اللي كيجمع الحزب الاشتراكي الموحد وفيدرالية اليسار الديمقراطي.

مصدر الصورة

وبخصوص شنو غادي تدير إلا نجحات فالدائرة، أكدت منيب لـ“كود” أنها غادي تخدم وتدافع على سكان المنطقة سواء كان التحالف فالأغلبية أو فالمعارضة، مشددة على أن الموقع داخل البرلمان ما غاديش يمنعها من طرح الملفات والدفاع على انتظارات المواطنين.

ومن بين الملفات اللي قالت إنها غادي تركز عليها، كاين الدعم فالجانب الاقتصادي، إضافة إلى التعليم فابور والجامعة، مؤكدة أن الهدف هو تقديم برامج ومقترحات تكون معقولة وقابلة للتنفيذ.

وللإشارة، كان تحالف اليسار قدم برنامجو الانتخابي للانتخابات التشريعية المقبلة تحت شعار “الكرامة أولا”، وتضمن مجموعة من المقترحات من بينها الدعوة إلى الانتقال نحو الملكية البرلمانية، وتعزيز دولة المؤسسات وربط المسؤولية بالمحاسبة.

وتضمن البرنامج مقترحات مرتبطة بالحكامة ومحاربة الفساد، وزيد عليهم إرساء نظام وطني للنزاهة والشفافية، وتجريم تضارب المصالح، واسترجاع الأموال المنهوبة، وتقوية الديمقراطية التشاركية.