لقجع كيبين أرقام “البام” قدام لباطرونا :280 مليار للدعم و97 مليار للتعليم .

كود- كازا //

قدم فوزي لقجع، عضو المكتب السياسي لحزب الأصالة والمعاصرة، قدّام مسؤولي الاتحاد العام لمقاولات المغرب، أرقام ومعطيات اقتصادية واجتماعية كبيرة، من بينها 280 مليار درهم للدعم، و97 مليار درهم لميزانية التعليم، و40 مليار للصحة، و2.9 مليون شاب خارج التعليم والتكوين والشغل.

وفلقاء عمل نهار الخميس 10 شتنبر 2026، قال لقجع بلي “البام” باغي يبدا من 2027 ورش هيكلة الاقتصاد غير المهيكل، وأكد أن الهدف ماشي هو الزيادة فالضرائب، ولكن إدماج الفاعلين الاقتصاديين فإطار واضح، وتمكينهم من الاستفادة من الدعم والتحفيزات.

وشار بلي الحزب عندو تصور اقتصادي حتى لـ2030، مبني على الإدماج البنكي، وتطوير الأداء الإلكتروني، وتنظيم المعاملات الاقتصادية، والاستفادة من تجارب دول قريبة للمغرب فالمستوى التنموي.

لقجع شدد حتى على أن القطاع الخاص خاصو يكون شريك أساسي فالتنمية وخلق الثروة وفرص الشغل، وقال بلي الاستثمار العمومي طلع بـ110 مليار درهم، أما شبكة الطرق السيارة ولات قريبة ل 1800 كيلومتر.

وفالنقل الجوي، كشف أن عدد المسافرين وصل ل 36 مليون مسافر، مع توقع ارتفاع هاد الرقم مع تجديد المطارات والاستعداد لتنظيم كأس العالم.

وبخصوص الحماية الاجتماعية، قال بلي عدد المستفيدين كيوصل حاليا ل 7 ملايين، و كاين جزء كبير من العاملين، خصوصا الفلاحين والحرفيين والعمال المؤقتين، مازال خاصو يتعالج وضعو الاجتماعي.

وعرض لقجع أرقام الميزانيات، كيف وضح أن الدعم وصل لـ280 مليار درهم، وميزانية الصحة طلعات من 19 لـ40 مليار درهم، والتعليم من 58 لـ97 مليار درهم.

وبخصوص التعليم، انتقد لقجع ضعف النتائج مقارنة مع حجم الإنفاق، وشار بلي المنظومة كتكلّف 100 مليار درهم سنويا، وفالمقابل كاين 300 ألف حالة انقطاع عن الدراسة كل عام.

كما تطرق للاستثمار الخاص فالتعليم، وقال بلي الهدف اللي كان مطروح قبل 20 عام هو توصل حصة القطاع الخاص لـ25 فالمائة، أما النسبة حاليا، حسب الأرقام اللي قدم، ما كتفوتش 13 فالمائة.

وفموضوع الأسعار، انتقد لقجع قوة الوسطاء فبعض القطاعات، خصوصا المنتجات الفلاحية، وتتسائل على كيفاش يمكن للثمن يوصل عند المستهلك لأربع أو خمس مرات الثمن اللي كيحصل عليه المنتج.

مصدر الصورة

وتوقف حتى عند المشاركة الاقتصادية للنساء، وشار بلي معدل النشاط كيوصل لـ69 فالمائة عند الرجال مقابل 19 فالمائة عند النساء.

وكشف لقجع أن البرنامج الانتخابي ديال “البام” جا فـ46 صفحة، لكنه مبني على وثائق ودراسات تفصيلية كتقارب 1200 صفحة، وقال إن الحزب غادي يبعثها للأحزاب السياسية ولـ“الباطرونا” باش يتفتح نقاش حول المقترحات وإمكانية تعديلها.

وفملف الشباب، قال لقجع إن حوالي 2.9 مليون شاب خارج التعليم والتكوين والشغل، إضافة لـ300 ألف حالة انقطاع عن الدراسة سنويا، فيما وصل معدل البطالة عند الشباب بين 15 و24 عام لـ27.2 فالمائة.

وختم بالتشديد على ضرورة التمييز بين الشغل والدخل، معتبرا أن وجود مداخيل محدودة ومتقطعة ما كيعنيش بالضرورة وجود عمل مستقر، وأن معالجة التشغيل والحماية الاجتماعية خاصها تبنى على هاد التمييز.