بالنسبة ليا بزاف ديال المغاربة كيعانيو من متلازمة الكفات لي ديما كيأنبو الضمير من بعد الإحساس بالمتعة واللذة، وهاد الإحساس كيحاولوا ينشروه ويعمموه على باقي الناس وخصوصا في مواقع التواصل، كتلقى واحد داير فيديو كيجري جنب البحر وفرحان ومستمتع وباغي يشارك مع الناس هاد اللحظة، كتلقى أغلب التعاليق عبارة على تصدير الإحساس بتأنيب الضمير، لبس تيشورط عاد صور، غطي العورة، الناس كتجري على طرف ديال الخبز ونتا كتجري على الهوى، كتلقى بنت مغربية رحالة بالبيكالة ومغامرة ولي دارت ماداروهش الرجال، دارت افريقيا بالبيكالة وهدر عليها رئيس رواندا پول كاگامي، في التعليقات كتلقى غير التحقير والتبوئيس، واش معندك واليدين، المرة خاص تسافر بمحرم، خاصك راجل عزوجي وتكلسي في الدار، وهادو لي كيهدرو فاش گاورية كتدير هادشي كيشوفوا فيها بإعجاب كبير، تقدر تدوز من حدا دوارهم ويضايفوها تبات تاكل وتشرب تخسر عليهم غير ميرسي، خاص غير تكون شهبة من بنات سيدنا عيسى.

هاد متلازمة الكفات كتبدا من مقولة الله يخرج هاد الضحك على خير، ينادم كيضحك ومتشائم من المستقبل حاس بلي الضحك ديما تابعاه القوادة، وكتشمل جميع مناحي الحياة، الشيخة كتشطح مفرحة راسها والناس وناشرة السعادة، غير تعطيها ميكرو تقوليك الله يعفو علينا من هادشي، فنان كبير كيغني ويبدع أسمى ما وصل ليه الإنسان، يقدر يطلع ليه داكشي لي كيدير في راسو ويعتازل عادي، هادشي كيديروه كاع الفنانة في العالم، في المغرب كيتوب ويدير اللحية ويبدى يطلب من الناس مايتصنتوش ليه، ويبدى يتعذب فاش يتفكر أيام مجده الفني، وغير بنادم عادي كيشرب بيرة وكيطلب لعفو بحال إلى هو سيريال كيلر، راه غير بيرة.

وطبعا هاد متلازمة الكفات هي ملازمة لذهنية التحريم المخيخة في مخ المغربي، والتخلص منها مايمكنش يوقع بلا التخلص من مصدر هاد التحريم أو على الأقل تجديده وإصلاحه، راه هادشي وقع في أوروبا مئات السينين دابا وكيوقع في عدة دول أخرى حاليا، كيتحلاو بالجرأة ويسوسوا عليهم مخلفات ذهنية التحريم، وهادشي خاصو غير إرادة حرة تبدى من التعليم والإعلام، راه في التاريخ البشري سبق لدول كاملة بدلات دينها او مذهبها غير في جيل واحد، أما تخلصها من الأفكار القديمة ودخولها للحداثة راه محتاج غير ربع جيل، لأن بنادم تواق وباغي خاصو غير ترفع ليه الكلفة والخنقة القانونية ومايتمش تذكيرو بعذاب القبر كل جمعة، باش يتخلص من تأنيب الضمير الملازم له في كل متعة كيمارسها.