أخنوش للمستفيدين من الدعم الاجتماعي المباشر: الخدمة مغادياش تحرمكم لمدة عام من الدعم .

مصدر الصورة

كود – سيدي قاسم///

طمّن رئيس الحكومة عزيز أخنوش المستافدين من الدعم الاجتماعي المباشر، وأكد باللي اللي غادي يلقى خدمة ويدخل لسوق الشغل، ما غاديش يتحرم مباشرة من الدعم، بل غادي يبقى كيستافد منو لمدة عام كامل.

وخلال لقاء حزبي ترأسو البارح الجمعة بجرف الملحة بإقليم سيدي قاسم، قال أخنوش باللي هاد الخطوة الهدف منها هو تشجيع المواطنين باش يقبلو على فرص الشغل، بلا ما يبقى الخوف من فقدان الدعم عائق قدامهم.

وقال رئيس الحكومة بشكل مباشر: «عندكم الحق يبقا عندكم الدعم المباشر وتمشيو تشتاغلو بلا ما يمشي ليكم الدعم المباشر لمدة عام».

وبهاد الإجراء، المستافد ما غاديش يبقى مضطر يختار بين الدعم المباشر وبين الخدمة، حيث غادي تكون عندو فترة انتقالية ديال عام باش يرتب الوضعية المهنية والمالية ديالو قبل ما تسالي الاستفادة من الدعم.

وكيشوف حزب التجمع الوطني للأحرار أن هاد المقاربة تقدر تخلي الدعم الاجتماعي المباشر وسيلة باش يعاون المواطنين يدخلو لسوق الشغل، وماشي سبب يخليهم يخافو من فقدان المساعدة اللي كيعتمدو عليها فمصاريف الحياة اليومية.

وفنفس السياق، كشف أخنوش على توجه لإحداث آلية خاصة بالعمال الموسميين، من خلال بطاقة غادي تمكنهم من الولوج لمنظومة الضمان الاجتماعي والحماية الاجتماعية.

وأوضح أن هاد الآلية غادي تستهدف بالخصوص العمال اللي خدامين بشكل موسمي ومداخيلهم ماشي مستقرة، بهدف تقوية الحماية الاجتماعية ديالهم وتحسين اندماجهم فهاد المنظومة.

وشدد أخنوش كذلك على أن التعامل مع الفئات الهشة ما خاصوش يكون غير بالأرقام والإجراءات، ولكن خاص حتى فهم الظروف ديالهم ومواكبتهم، وقال: «حنا كنفهمو الضعفاء».