دافع وزير السياسة الترابية الإسباني والمكلف بالقيادة الموحدة لاستجابة الحكومة في سبتة، أنخيل فيكتور توريس، على طريقة تعامل مدريد مع موجة الدخول الجماعي اللي عرفتها المدينة المحتلة نهار 30 و31 يوليوز، مؤكدا أن السلطات تمكنت من إعادة ما بين 90 و95 في المائة من أكثر من 70 ألف شخص وصلوا لسبتة ف48 ساعة.

وكال توريس، فالبرلمان الإسباني، إن مدريد دخلات حاليا فـ“مرحلة ثانية” كتهم الجانب الأمني والإنساني، والهدف منها يرجعو كاع المهاجرين اللي دخلوا فهاد الأحداث، ولكن “ضمن هوامش القانون” ووفقا للمنظومة القانونية الدولية.

وأكد الوزير أن هاد العملية مايمكنش توقع بشكل جماعي وبالزربة، خصوصا فالحالات اللي كتهم القاصرين، مشددا على ضرورة احترام ’’المصلحة الفضلى للقاصر” بالنسبة للأطفال اللي مايمكنش يجمعو شملهم مع عائلاتهم.

ورد توريس بشكل مباشر على مطالب الحزب الشعبي وحزب “فوكس” بتنفيذ عمليات إعادة جماعية، واصفا اللي كيقول إن جميع المهاجرين يمكن يرجعو “بين ليلة ونهار” بأنه “كذاب” و“متهور”، مؤكدا أن القانون والاجتهادات القضائية كتحكم هاد العمليات، وبالتالي مايمكنش تجاوزها.

وندد المسؤول الإسباني بالاعتداءات اللي طالت المهاجرين، خصوصا المسلمين منهم، كما رفض التهديدات اللي تعرض ليها متطوعو الصليب الأحمر والصحافيون اللي كيغطيوا الأزمة.

وكشف توريس، أن السلطات الإسبانية وسعات مركز الإقامة المؤقتة للمهاجرين “CETI” بـ400 مكان جديد، باش تزاد طاقتو الاستيعابية إلى 1183 مكانا، فيما كيوصل عدد الأشخاص اللي تم إيواؤهم حاليا فالمدينة إلى حوالي 1827 شخصا.

وبخصوص الوضع الإنساني، شار الوزير إلى توزيع آلاف المساعدات وإحداث منظومة للرعاية الصحية كتضم أكثر من 60 مهنيا، مع اعتماد متابعة فردية للعيالات والفتيات اللي كيعانيو من هشاشة خاصة.

وختم توريس بالتأكيد أن الحكومة الإسبانية باغية ترجع الوضع الطبيعي لسبتة “فأقرب وقت ممكن”، مع التشديد على أن أي معالجة للملف، خصوصا ما يتعلق بالمهاجرين والقاصرين، غتبقى مرتبطة بالقانون الإسباني والدولي.