أحداث سبتة.. مدريد كتراجع قوانين الهجرة واللجوء: اللي ترفض ليه طلب اللجوء يقدر يطعن قدام القضاء والآجال ديال معالجة الملفات غادي ينقص والقاصرين عندهم أولوية .

مصدر الصورة

أميمة عطية – كود كازا ///

صادقت الحكومة الإسبانية، على 2 قوانين باش اعدلو منظومة الهجرة واللجوء، بهدف ملاءمة التشريع الإسباني مع الميثاق الأوروبي الجديد للهجرة واللجوء، بسبب الأحداث اللي عرفتها سبتة نهاية يوليوز.

وجا هاد والتعديل لبارح الثلاثاء 25 غشت ، بحيت غادي يمس بالأساس قانون اللجوء والحماية الدولية رقم 12/2009، والقانون التنظيمي رقم 4/2000 المتعلق بحقوق وحريات الأجانب والإدماج الاجتماعي ديالهم فإسبانيا.

ومن أبرز التغييرات اللي كشف عليها وزير الداخلية الإسباني، فيرناندو غراندي-مارلاسكا، كاين تسريع مسطرة الطعون الإدارية فملفات اللجوء، بحيت القرار الصادر عن مكتب اللجوء واللاجئين يقدر يكون قابل للطعن مباشرة قدام القضاء، و انقصو من الآجال الزمنية وتنظيم الملفات بشكل أكثر سرعة وفعالية.

وأكد مارلاسكا أن هاد التعديلات ما كتعنيش التخلي على دراسة طلبات الحماية الدولية، وإنما إعادة تنظيم المساطر باش تكون أسرع وأكثر وضوحا، مع الحفاظ على الحقوق والحريات الأساسية.

وشدد الوزير الإسباني ، على أن القاصرين غادي يبقاو فموقع الأولوية، باعتبارهم فئة هشة، مؤكدا أن إصلاح قوانين الهجرة واللجوء خاصو يكون منسجما مع حماية حقوق الإنسان.

وجات هاد الخطوة الحكومية فالسياق ديال الأحداث اللي عرفاتها سبتة نهار 30 يوليوز، واللي وصفها مارلاسكا بأنها كانت نتيجة مجموعة من العوامل، مشيرا إلى أن الحجم ديال محاولات الدخول كان استثنائيا، بعدما انتقل، حسب كلامو، من معدل حوالي ألف محاولة فالأسبوع إلى أكثر من 70 ألف في 24 ساعة.

وشاد المسؤول الإسباني فهاد السياق بالتعاون مع المغرب، مؤكدا أن السلطات المغربية أحبطت أعدادا كبيرة من محاولات الدخول، خصوصا بلعومان فلبحر ، ومشددا على استمرار التنسيق بين مدريد والرباط لتفادي تكرار مثل هاد الأحداث.