واش عمّرك شفتي شي مول لوطيل مشا لشي دار مولاها حاطها للكراء اليومي وبدا كايقطع فالفراش وكايلوح فالمخاد للزنقة؟ ايوا راه هادي هي البلطجة لي كايديرو شي طاكسيات مع الدراري ديال اين درايڤ! گاع الدول لي نظمات كاس العالم مؤخرا عندها تطبيقات النقل إلاّ المغرب فين باغين شي طاكسيات يبقاو بوحدهم مسيطرين على الساحة وحارمين المواطن من خدمة نقية .

مصدر الصورة

سهام البارودي – كود//

كيفاش قصّة شي طاكسيات خصوصا فكازا لي ولاّو باغين يمارسو البلطجة على الناس لي خدامين فإيندرايڤ و يبراكيوهم و يديرو خدمة البوليس و المخزن ؟ واش الدولة كايخلعوها الطاكسيات ؟ آش هاد الضسارة واش هاد الحگرة ؟
الأغلبية ديال الدول الكبيرة فالعالم فيها تطبيقات النقل، وا الدزاير لي كانضحكو عليهم و عندهم عرام ديال تطبيقات النقل، بلا مانضهرو على الدول لي نظمات كاس العالم مؤخرا فحال قطر و المكسيك و ميريكان و كندا …إلاّ عندنا فالمغرب فين الصراع بين الطاكسيات و ايندرايڤ ولاّت فيه البطلجة هي سيدة الموقف.
انا بعدا كمواطنة مغربية ساكنة فكازا و عارفة فحالي الملايين، بغينا يبقاو تطبيقات النقل و يتقننوا و دير ليهم الدولة لي حل باش تحميهم من البلطجة لي كايتعرضو ليها من صحاب الطاكسيات، راه ماكاينش مغربي واحد ماتعرضش لشي موقف خايب مع شي مول الطاكسي، مايديكش فين بغيتي، مايهزش ثلاتة، مايخدمش الكونطور، مايدخلكش لشي زنقة مابغاش يدخل ليها، ها لاواه الزحام، ها لاواه الحفاري، ها لاواه غادي نتغذا …
مالنا على حالتنا ؟ سير آخويا تغدى و خلي المواطن يعيط لإيندرايف يوصلو فين مابغى بثمن مناسب ! فالليل فالصباح، وسط او خارج المدينة …. المنافسة مطلوبة و خاصها تكون فجميع القطاعات و خصوصا قطاع النقل لي مسوس بالفساد و الريع.

المستقبل هوا التطبيقات، وا قشبال ديال الطاكسي، راه تعيىى ماضّارب و تعيى ماتخرج كشاكشك، التطبيقات داخلة داخلة للبلاد، هاد العام و لا العام الجاي و لا فكاس العالم، فحال لي دخلات اير بي اند بي لقطاع السياحة وولات كاتنافس لوطيلات !