لنفترض أن الدولة زادت في السميك مثلا، راه نفس الصالير لي يقدر يعيشك في بوذنيب أو الراشيدية ماغاديش يعيشك في طنجة او الرباط ، راه غير منطقي تكون الضريبة موحدة والسميك موحد وخطبة الجمعة موحدة والغرامات موحدة.. .

مصدر الصورة

محمد سقراط-كود///

لنفترض أن الدولة زادت في السميك مثلا، راه نفس الصالير لي يقدر يعيشك في بوذنيب أو الراشيدية ماغاديش يعيشك في طنجة او الرباط ، راه غير منطقي تكون الضريبة موحدة والسميك موحد وخطبة الجمعة موحدة والغرامات موحدة.. راه باقين خدامين بنهج ديال القرون الوسطى باقي متحركناش من بلاصتنا من نهار دخلات فرنسا ودارت لينا دولة حديثة وقانون مدني ومحاكم وأجهزة، راه مخاصش يكون السميك موحد حتى في القطاعات ديال العمل، قطاع المطاعم خاص يكون مختالف على قطاع توصيل الطعام على العمل في المعامل، كل قطاع خاصو حد أدنى للأجور بوحدو، راه هادشي لي دايرين الدول المتحضرة في العالم، وكل جهة او اقليم عندو خصوصيات واقتصاد خاص، راه منطقي يكون فرق في الضرائب والحد الأدنى للاوجور وكولشي.

راه خاص تفعيل الجهوية الموسعة الحقيقية مايبقاش المغرب مقسوم لمغرب نافع وغير ناقع وفي نفس الوقت يخلصوا بجوج تفس الضريبة ويشدو نفس الصالير، بالاظافة خاص آليات لتفعيل هاد القوانين، المغرب من ناحية تطبيق القانون راه تقريبا سايبة الوقت، مثلا دور في الشانطيات وشوف آش لابسين العمال، الجيلي والكاسك والسباط الخاص بالشانطي راه غير إشاعة، ولي تلقى عندو بياسة متلقاش لخرى، يا جيلي بلا كاسك يا كاسك بلا سباط، وهاد العبث راه تبناو بيه الاوراش الكبرى في الرباط العاصمة، كاين فيديو ديال عامل كيصاوب سقف تيران الرباط، ولابس صندالة دالصبع وطبعا بلا جيلي بلا كاسك بلا سباط، ويقدر يكون بلا كونطرا بلا حتى حاجة غير عطاش شاد داك السقف عطش.

هاد الطريقة باش غادي المغرب راه بدائية وغير منطقية ومتحجرة، المغرب بلاد كبيرة وجهاتها مختالفة ومتباينة بزاف، واش شمال المغرب بجغرافيته وثرواته وقربه من اهم سوق عالمي هو سمارة والمحبس وطاطا وگاع داك القنت، راه غير منطقي يكون كولشي موحد بين مناطق المغرب كلها، راه هادشي فيه تمييز وحگرة وتسلط ومركزية مبالغ فيها، خاص نتعلموا من سويسرا، تسعود دالمليون انسان كينتجوا ثرليون دولار، كثر من اقتصاد المغرب بستة دالمرات او خمسة، ومع ذلك كل كانتون بوحدو كيعيش وضعية اقتصادية خاصة بيه، وطبعا راهم انجح بلاد معاتمدة هاد التقسيم، راه خاص تخلق حتى منافسة داخلية بين الجهات وكل جهة تقدم تنازلات ضريبية لجلب المستثمرين بحال كيف واقع بين الولايات الامريكية، حنا ديما خاص نتسناو الرباط، طلع للرباط هبط من الرباط الأوامر جايا من الرباط، راه كثير هادشي على الرباط خاص كل واحد يسير القنت ديالو.