وايني طلية كحلة طليناها مع هاد “الزماگرية الجدد”، صحاب أختي أختي، La hijra, Le Hlel … أبناء الضواحي الأوروبية لي كايعانيو من أزمة هوية و لي عاد فاقو من الگلبة ولاّو باغين يعلمو للمغاربة دينهم فحالا المغاربة ماشي مسلمين أبا عن جد.

شحال هادي كان الزماگري معاه الخير و النشاط، هوا لي كايتهلا فالعائلة وو فولاد الدرب و كايخرجهم معاه للسهرات و ليبواط و المواسم و النشاط، كايجيب معاه آخر ماكاين فاللباس و الروايح، دابا بلانا الله بشي نماذج معاهم غا الغبينة و القهرة و الشكا و البكا ، غالطين فالعنوان و كايصحابهم المغرب هوا افغانستان، يقدرو يعيشو فيه داك الحلم الإسلاموي لي عندهم.

هادشي علاش كايتصدموا فاش كايجيو مثلا لطايتي و كايلقاو بلي ممنوع السباحة بالبوركيني، ايه نعام آ سيدي ممنوع السباحة بالبوركيني و ماشي غير فطايتي فأماكن بزاف فالمغرب، السباحة عندها لباسها فالعالم كامل، مايو د السباحة خاص، عندو معايير كاتراعي للنظافة و الأمان د الشخص لي كايعوم و الناس لي كايعوم معاهم ! عجبك هادشي عوم ماعجبكش سير بني لابيسين ديالك و عوم فيه ديك الساعة نتا باللبسة ديال رواد الفضاء ! و ياك باغين تعيشو فحال السلف الصالح ؟ ايوا واش عيالات السلف الصالح كانو كايديرو التسالطوات فلابيسينات ؟ عيالات السلف الصالح كانو كايعومو وسط الرجال ؟ و لا نتوما باغين الزبدة و فلوس الزبدة و ترمة مولات الزبدة ؟!

هادو نيت لي كايتصدمو فاش كايشوفو عين الدياب زاهية فالصيف و لي بواط و الريسطورات فيهم الطايح اكثر من النّايض ! و شنو يصحاب ليكم ؟ الحريات و النشاط و الحقوق و الفن و الجمال محصورين غي فأوروبا ؟ المغاربة مايستاهلوش زعما ؟ ماشي وجه الموسيقى و المهرجانات و الحيحة ؟

دابا غانوليو ماحيلتنا لللحايا ديالنا مايد اين موروكو، ماحليتنا لهاد اللحايا آمبورطي لي جايبين معاهم الفهم الاعوج للدين و القباحة و الضسارة ديال لهيه ! وا سيرو حنا معاكم بالله و بالشرع مخليين تجيبو لينا معاكم شي علم شي تيكنولوجيا شي مشاريع شي افكار متنورة، جايبين لينا الافكار ديال القرون الوسطى لي فشلتو طبقوها فأوروبا.