علنت الهيئة الوطنية للطبيبات والأطباء على إطلاق منصة رقمية جديدة، الهدف منها تسهيل الإجراءات الإدارية وتقريب الخدمات من الأطباء، عبر تمكينهم من تدبير عدد من الملفات عن بعد بلا ما يبقاو محتاجين يتنقلو للمجالس الجهوية.

وحسب بلاغ ديال لهيئة ، هاد المنصة الجديدة، اللي جات فإطار استراتيجية التحول الرقمي ، غادي تخلي الأطباء يديرو مجموعة من الطلبات إلكترونيا، بحال التسجيل، ونقل الوضعية، وتغيير العنوان المهني، والتوقف عن ممارسة المهنة، والاستبدال، إضافة للاتفاقيات والعقود.

وماشي غير تقديم الطلبات، حتى تتبع الملفات غادي يولي ممكن بشكل مباشر، بحيث يقدر الطبيب يحمل الوثائق المطلوبة، ويتابع فين وصل الملف ديالو، ويتوصل بالقرارات والشواهد والوثائق الإدارية عبر الفضاء الشخصي ديالو فالمنصة.

وفهاد السياق وضحت لهيئة فنفس لمصدر، أن حتى أداء الرسوم والاشتراكات غادي يولي عبر التحويل أو الإيداع البنكي، مع إمكانية إرفاق وصل الأداء فالملف الرقمي، وهو الشي اللي غادي ينقص من التنقلات ويسرع معالجة الملفات.

وكالت الهيئة، إن المنصة متوفرة على مدار الساعة وطيلة أيام الأسبوع، وكتندرج فإطار تنزيل مقتضيات رقمنة خدمات الهيئة، بهدف توفير إدارة أكثر سرعة وسلاسة للأطباء

ودعات الهيئة الوطنية للطبيبات والأطباء جميع الممارسين باش ينشئو الحسابات ديالهم ويستافدو من المنصة الجديدة، اللي ولات متاحة 24 ساعة فالنهار وطيلة أيام الأسبوع.

وللاشارةً فقط ، فاطلاق هاد المنصة كيجي فإطار تنزيل المقتضيات القانونية المتعلقة برقمنة خدمات الهيئة الوطنية للطبيبات والأطباء، خصوصا المرسوم رقم 447-15-2 الصادر فـ6 مارس 2016، المرتبط بتطبيق القانون رقم 13-131 المتعلق بمزاولة مهنة الطب