شوهة "دوزيم" على لحريگ الجماعي لسبتة. صمنا وفطرنا على بصلة لا ديكور لا عمق لا صراحة لا نقد ذاتي غير لغميق .

مصدر الصورة

هناء ابو علي كود كازا ///

البارح الأربعاء القناة الثانية 2M كانت دايرة برنامج قاليك “خاص” على أحداث سبتة. جايببن محللين باش يهدرو ويحاولو يقدمو تفسيرات وقراءات في الكارثة الانسانية اللي وقعات مؤخرا. غير الديكور و تنظبم النقاش تبجب الهم و الفم. معليناش! كنت تنتوقع من بعد مدازو هاد ليام كاملة من صمت القبور ديال الإعلام ديالنا غادي تكون شي جلسة مصارحة و نحطو و نقاشو الأمور بكل صراحة و نتقبلو نقط ضعفنا و هفواتنا، راه ماشي عيب و كما يقال الاعتراف بالذنب هو نصف الغفران… ولكن هيهات تم هيهات! القطب الاعلامي حالف يخرج لينا المرارة من بعد ما القفصة و الغم ديال هاد الاحداث المشؤومة… واحد متدخل قاليك السلطات من حقها تاخد وقتها باش تواصل. أيه اسيدي من حقها تأخذ الوقت الكافي باش تجري التحقيقات و تتستمع لجميع الاطراف و تفك خيوط هاد اللغز الهيتشكوكي ديال 40 ألف ديال خلق الله غادية تتلاح فالبحر…

ولكن أسيدي الفاضل، من حقنا كبشر، ماشي حتى كمواطنين حيث من بعد هادشي اللي طرا، صعيب تعاود تهدر على المواطن المغربي…

حنا هنا فقط دافعي الضرائب…يخرجو و يقولو لينا عطينونا وقت راحنا سمعناكم و نتألم لألمكم و صبرو علينا… علاش فكل فاجعة مكاينش الحس الانساني، علاش تنحسو براسنا يتامى، علاش ممثل الدولة اللي هي تعرضات لاختراق لحدودها تيعزينا فموتى ديالنا، فولادنا و بناتنا و حنا ولا واحد تيراعي مشاعرنا و بلي حتى حنا بغينا غير اللي يقول عليهم ” تغمدهم الله برحمته” فهاداك البلاغ الجاف كالسنوات العجاف اللي دازت علينا.

اسيدي نتوما مؤسسة سيادية متتعزيش ولكن القوة بلا برحمة فهي قسوة و نتوما قسيتيو علينا جميعا فما بالك بعائلات الضحايا. كيف غادي يكون احساسهم و ولادهم يختزلون فرقم اللي ماشي حتى صحيح! واحد ساعة فالبرنامج الصحفي تيمشي للحمام ديال النسا يذاكر مع الطيبات! و تيبانو ليك فالخلفية السطولة مستفين و هو متكي على كونطوارو اودي أشد داك لحمام العيالات خلبك فبلاطو البأس ديال 2m… مقرف بصح!

وبغيت نعرف كيفاش دخل لحمام العيالات! واش باش تهدر على الهشاشة فالمعرب محتاج تدخل ليها للحمام! رحمونا راه قلبنا طايب! باركا من الاستكلاخ!

قلبت مشيت لقناة اسبانية نشوف الوضع فسبتة: بلاطو مباشر، فسبتة على أوضاع اللي باقين، حاكم سبتة فالمباشر تيطلب الاعانات من السلطة المركزية و ينطالب بتضامن الجهات باش يستقبلو القاصرين، وليدات يفترشون الارض فسبتة، لا حنين لا رحيم، ربورتاجات على الضحايا و عائلاتهم من تطوان… من بعد، مراسلة القناة من الفنيدق تطل علينا لنقل الاوضاع بالمنطقة، شوية جوج وليدات صغار من قدام الكاميرا تيتلاحو فالبحر قاصدين سبتة!

الوطن هو الملاذ الامن، هو الاحساس بالانتماء الجماعي، ماشي غير باش المنتخب يماركي و يتأهل و زطوطوطوط و هلا هلا هلا…واحد المثل اسباني تنقولوه حنا المبليين بفيروس ديال الريال مدريد ملي تيخسرو و تيتقبو لها العين: حنا معاكم فالطايبة و الخضرا! و كونو معانا حتى نتوما فالحلوة و المرة