تقرير استخباراتي صبليوني: المغرب كان متبع مزيان دخول الحراگة لسبتة بالأقمار الاصطناعية ديالو لي دازو 11 لمرة فوق المدينة عكس ساتليت ديال اسبانيا لي داز غير مرة وحدة .

مصدر الصورة

كود -سبتة//

قال تقرير استخباراتي إسباني نشراتو جريدة ذا أوبجكتيف، باللي المغرب استعمل مزيان الأقمار الاصطناعية العسكرية ديالو باش يتابع الأزمة اللي وقعات فسبتة، وقدر يجمع معلومات ميدانية دقيقة على تطورات الوضع وتحركات القوات الإسبانية.

وحسب التقرير، القمر الاصطناعي المغربي “محمد السادس – أ” داز 11 مرة فوق منطقة المضيق مني بدا التدفق الجماعي للمهاجرين، أما القمر الاصطناعي الإسباني PAZ دار غير مرة وحدة، هاد الشي خلا المغرب، حسب المصدر، يتوفر على صور ومعلومات على اللي كان كيوقع فالحدود.

وزاد التقرير أن القمر “محمد السادس – أ” كان كيدوز فوق المنطقة نهار 30 يوليوز مع 10:57 صباح، وهي نفس اللحظة اللي الاستخبارات الإسبانية اعتبراتها بداية التدفق الكبير ديال آلاف دناس من الفنيدق لي قاصدين معبر تراخال.

ومن بعد، بقا القمر “محمد السادس – أ **”ومحمد السادس – ب”** كيتناوبو على تصوير المنطقة، بمعدل جوج صور كل نهار تقريباً، وحدة فالصباح ووحدة فالليل، باش يتم تتبع الوضع بشكل متواصل.

وكيقول التقرير إن الأقمار الاصطناعية المغربية كتقدر تلتقط صور بدقة كتقرب لـ50 سنتيمتر، بفضل التكنولوجيا اللي تطورات بتعاون مع فرنسا، وهاد الدقة كتخلي يكون رصد الأشخاص والآليات العسكرية ومقارنة أي تغييرات كتوقع فوق الأرض.

كيف ما قال المقال على نفس المصادر العسكرية الإسبانية أن هاد التغطية الفضائية خلات المغرب يراقب تحركات الجيش الإسباني والحرس المدني على الحدود بشكل مستمر.

كما شار التقرير إلى أن هاد العمليات تزامنات مع وجود الملك محمد السادس بمدينة تطوان بمناسبة احتفالات عيد العرش، وسط تعبئة وتنسيق أمني وعسكري كبير.

وخلص التقرير بلي كترة المراقبة ديال الأقمار المغربية خلات الرباط، حسب الرواية الإسبانية، تحصل على معلومات أكثر سرعة واستمرارية مقارنة بإسبانيا، وهو ما اعتبره التقرير تفوقاً واضحاً فالمراقبة والاستطلاع خلال أزمة سبتة.