فاجعة الحريگ الجماعي لسبتة ..عضو اللجنة المركزية للهجرة واللجوء لـ" كود" : المغاربة فقدو الثقة وخاص ممرات آمنة للهجرة ومن حق الناس يختارو فين بغاو يعيشو .

مصدر الصورة

أميمة عطية – كود كازا ///

تزادت حصيلة الناس لي ماتو فالبحر منين حاولو يوصلو لسبتة، ووصلات ل 67 وفاة هاد الصباح السبت 1 غشت ، بحيت جبدو السلطات الإسبانية جثث جديدة لمهاجرين حاولوا يدوزو من السواحل المغربية لسبتة في مشاهد مخيفة دارت ضجة على مواقع التواصل الاجتماعي .

هاد الصدمة لي هزات المغرب رجعات ملف الهجرة غير النظامية للواجهة، خصوصاً مع حجم التدفق الجماعي اللي عرفاتو المنطقة، واللي طرح من جديد أسئلة بخصوص الأسباب اللي كتدفع صغار ، كبار ، رضع عيالات رجال ، وغيرهم يغامرو بحياتهم فالطريق مجهول المصير.

وفهاد السياق وفتصريح خاص لـ“كود”، قال حكيم سيكوك، عضو اللجنة المركزية للهجرة واللجوء ورئيس فرع الجمعية المغربية لحقوق الإنسان بالرباط ، ان ما وقع فسبتة كيعكس، وضع اجتماعي صعيب ولا كيعيشوه المغاربة.

وزاد سيكوك: “أكثر من 50 ألف مغربي ومغربية تجاوزوا الممر الحدودي ديال سبتة المحتلة فظرف 24 ساعة و هاد النزوح الجماعي كنشوفوه غير فالمجاعات والحروب والكوارث الطبيعية، وهادشي كيبين أن الوضع كارثي”.

وزاد ضاف رئيس فرع الجمعية المغربية لحقوق الإنسان أن هاد الأحداث، كتدل على أن “الناس فقدات الثقة، وكتحس أن المستقبل ديالها ما عندوش ملامح”، مشيراً إلى أن قطاعات بحال التعليم والصحة وفرص الشغل خاصها تكون فواجهة الاهتمام حيت مابقاتش كترضي المغاربة.

واعتبر سيكوك أن المسؤولية كتحملها، السياسات المتبعة منذ سنوات، واكد إن التركيز على صورة المغرب ف الخارج خاصو يكون موازياً للاهتمام بظروف عيش المواطنين.

وفي الجانب المرتبط بالحلول، وفتصريحو ل ” كود” ، دعا سيكوك باش يتفتح نقاش فهاد الملف ويتحلو مسارات آمنة للهجرة، واضاف: إن “حق التنقل حق إنساني”، وأنه من حق كل واحد يختار البلاصة لي باغي يعيش فيها. ودعا حتى إسبانيا باش تحترم كرامة المهاجرين وتعامل معهم وفق الالتزامات الدولية.

وختم سيكوك برفضو الاتفاق لي دار بين المغرب واسبانيا باش رجعو الناس، مشددا على أن القانون الاسباني كيفرض اجراءات إدارية قبل عملية الترحيل وأنهم خاصهم يحتارمو المواثيق الدولية.