و من الفقرات لي دارت الانتباه ، فقرة الفنانة كريمة غيث لي طلعات للمنصة باش تغني أغنيتها الجديدة “خاطيني” فإطار لوحة استعراضية كوريغرافية بمشاركة مجموعة من الراقصين، هاد العرض خلا بزاف ديال المتابعين يعتبرواه “كلاش فني مباشر” لأي واحد كينتقد أو كيطيع من قيمة العيالات المغربيات.

“أنا مقابلة راسي”.. الميساج وصل من التيران حتى للمنتقدين

جا أداء كريمة غيث لهاد الأغنية فافتتاح بطولة مخصصة للعيالات كاختيار ذكي وعندو دلالات قوية،فالوقت اللي كانو فيه لبؤات الأطلس كيتقاتلو فوق أرضية الملعب وكيحققو رباح كبير على كينيا بـ4 لزيرو، كانت كريمة فوق المنصة كاتغني بثقة: “أنا مقابلة راسي وإنتايا حاضيني، ما عنديش الوقت عقلي دابا مامسالي”،هاد الكلمات عبرات على عقلية المرأة المغربية الناجحة اللي مركزة غير على راسها، وما كتعطيش قيمة للهضرة الخاوية والإشاعات، وكتفضل تخدم على أهدافها ومستقبلها، ماشي”بنادم الخاوي” غير كيتبع القيل والقال كيف ما كتغني الفنانة.

مصدر الصورة

وحتى الللوحة الكوريغرافية بلي الاستعراض ما كانش غير غناء، ولكن كان لوحة بصرية متكاملة خلطات بين الحداثة والهوية المغربية. وملي كتغنى كريمة المقطع المعروف: “كيف ما كتقولي الواليدة، حضي راسك من الناس اللي مريضة” و**”نتوما فيكم الغيرة حيت معدنّا ما كاينش فحالُو”**، كانت الحركات الكوريغرافية اللي رافقات الأغنية كتعبر على القوة والصمود، وعلى التربية المغربية الأصيلة اللي كتخلي المرأة المغربية واقفة على رجليها وما كتتأثرش بالانتقادات ولا بالغيرة اللي كيخلقها نجاحها، سواء فالفن أو فالرياضة أو فالحياة المهنية.

من طنجة للكويرة.. المغرب كيبني والآخرين مقابلين الهضرة

أداء أغنية “خاطيني” وسط هاد العرس الكروي الإفريقي أكد واحد الفلسفة ديال أن المغربيات كيردو على أي انتقاد بالعمل والنجاح وخدمة بلادهم، وما كيضيعوش وقتهم فالرد على الهضرة، وكما ختمات كريمة غيث اللوحة الاستعراضية بكلمات: “من طنجة للكويرة” أكدو لبؤات الأطلس بدورهم من وسط التيران، بالاداء والنتيجة، أن الروح الجماعية والعزيمة المغربية باقية ديما حاضرة فالمحافل الكبرى، وكتحمق كل واحد راس مالو غير الكلام والإشاعات.

وفالأخير، كان حفل الافتتاح رسالة فنية ورياضية فدقة وحدة، لي جمع بين الاعتزاز بالهوية المغربية، والاحتفاء بالمرأة الإفريقية، وقدّم صورة على المغرب اللي كيراهن على الإبداع والنجاح والعمل، و التشبث براحة البال والثقة فالنفس فوق أي انتقاد أو تشويش.