البحورة فالمغرب ولاو كايشبهو لنهر الغانج بقوة الوسخ وتاهيماجيت وجلوف الدلاح! البحر مابقات فيه حتى شي جمالية، وكانظن أنه الأجيال ديال السبعينات والثمانينات وحتى التسعينات تبحروا في ظروف أحسن من الأجيال الحالية.

شحال هادي كنتي كاتمشي للبحر كاتشوف الدوبياس والمايويات والباراصولات والنقى، ودابا وليتي كاتمشي للبحر فحالا مشيتي للموسم د مولاي قبتين، الناس دايرين الخيام وليزور فحال اللاجئين فدارفور، والعيالات بالبيجامات والبوركينيات، وقوة الزيوف، والرجال بدوك السوفيطمات البويض طايبين بالصابون! وشي وجوه وشي فورمات عوجين ديال سوء التغذية.

هادشي راه كايخلق واحد النوع ديال الطبقية الجمالية، اللامساواة! كايولي مول الفلوس عندو الحق فالجمال والحازق كاتشيط ليه غي الخيوبة، مول الفلوس كايمشي يتبحر مع راساتو فلاكوسطا ديل صول هوا ومراتو ووليداتو ويتمتع بالشواطئ المنظمة، كلشي فبلاصتو، الباراصولات، الفوطات، الطرونزاطات… ولا تشهى شي بيرا ولا شي بايلا يكومونديها فشي تشيرينگيتو ويجيبوها ليه تال الباراصول ديالو، كايمتع عينيه بالما ازرق والرملة ذهبية، ومراتو كاتعوم بالمايو دوبياس بأمان و ووليداتو كايلعبو فالرملة في أمان…

عكس الحازق، الحازق كاتشيط ليه غي البشاعة والقبح، الحازق كايعوم فبحر لونو قهوي، لي لاباس عليه كايدير نضاضر د الما وكايشوف الحوت دايز فماربيا والحازق مايحتاجش يدير النضاضر د الما حيت كايلقى راسو كايعوم وكاتعوم حداه خرية فوق الما فحال شي تمساح فقاع اسراس ولا ليكوش ديال شي درّي شبعانين بول، الحازق كايشيط ليه البحر عامر زبل و مراتو باش تعوم خاصها تلبس نفس البيجامة لي كانت كاتقلي بيها الفلفلة والدنجال الصباح و ولدو كايلعب و فيد الله تقدر تجي فيه شي كرة توضر ليه الدماغ! بلا مانهضرو على الدجيتسكيات وصحاب البيدالو لي مزاحمين مع عباد الله وكايسببو الكوارث.

المشكل طبعا عمره ما كان فكون الناس فقراء ولا أغنياء، المشكل فتاهرگاويت، فانه المغاربة كايطبعو مع الفوضى والوسخ والعشوائية حتى كايوليو غارقين فيهم. البحر خاصو يكون متنفس للجميع، ماشي امتياز للي عندو الفلوس وعقوبة للي ماعندوش. ولكن ملي كايولي الأمن والنقى والنظام والحرية كايتباعو بالفلوس، ديك الساعة الحازق كايهز القالب.