ذكرات المديرية العامة للضرائب المهنيين والمقاولات بآخر الآجال الخاصة بعدد من الالتزامات الضريبية، وحددت 31 يوليوز 2026 كآخر موعد باش يديرو التصاريح والأداءات المطلوبة.

وحسب بلاغ المديرية ، فهاد الإجراء كيهم بالخصوص الأشخاص اللي وصل رقم المعاملات ديالهم لأكثر من 2 مليون درهم بلا احتساب الضريبة على القيمة المضافة، وحتا للشركات والأشخاص الذاتيين اللي خاضعين لنظام النتيجة الصافية الحقيقية أو النتيجة الصافية المبسطة، والمقاولين الذاتيين، و الخاضعين للضريبة على القيمة المضافة.

ووضح البلاغ ، أن الأشخاص الاعتباريين والذاتيين اللي فاق رقم المعاملات ديالهم جوج مليون درهم برسم السنة المحاسبية اللي تسالات قبل فاتح يناير 2026، خاصهم يدلو بالتصريح المتعلق بآجال الأداء برسم الربع الثاني من سنة 2026، ويأديو المبالغ المستحقة إلكترونياً عبر فضاء المهنيين SIMPL-Délais de paiement.

وزادت ضافت المديرية، أن لفاكتورات اللي ما تخلصاتش في الآجال القانونية خاصها تكون مؤشرة حسب الحالة، من طرف مراقب الحسابات بالنسبة للمقاولات اللي رقم المعاملات السنوي ديالها وصل أو فات 50 مليون درهم بلا احتساب الضريبة على القيمة المضافة، أو من طرف خبير محاسبي أو محاسب معتمد بالنسبة للمقاولات اللي أقل من هاد السقف.

وشددات المديرية على أن عدم وجود فاكتورات متأخرة ما كيعفيش من الإدلاء بالتصريح المتعلق بآجال الأداء، والتأشير على الوثائق المطلوبة حسب كل حالة.

وبالنسبة للمقاولين الذاتيين، فاللي خدامين بنظام التصريح الربع سنوي خاصهم يصرحو برقم المعاملات ديال الربع الثاني من سنة 2026 ويأديو الضريبة المستحقة قبل 31 يوليوز، أما اللي اختارو التصريح الشهري فعليهم التصريح بمعاملات شهر يونيو وأداء الضريبة داخل نفس الأجل.

وفما كيخص الضريبة على القيمة المضافة، ذكرت المديرية الخاضعين لهاد النظام بضرورة التصريح والأداء ديال الضريبة المتعلقة بشهر يونيو أو الربع الثاني من سنة 2026، حسب النظام لي في منصة SIMPL-TVA.

ودعات المديرية العامة للضرائب جميع المهنيين والمقاولات باش يحترمو هاد المواعيد، ويتفاداو التأخير فالتصاريح أو الأداءات، تفادياً لأي غرامات أو جزاءات ممكن تترتب على عدم احترام الآجال القانونية