قبل شهرين تقريبا من نهاية عمر الحكومة رسميا وتبدا الحملة الانتخابية، خرج نزار بركة أمين عام حزب الاستقلال، بخطاب سياسي فيه ريحة الانتخابات طبعا، حول الفساد.

ندوة وطنية نظمها حزب علال حول الفساد، فيها الشفوي بزاف ولكن مافيهاش أرقام ومعطيات دقيقة حول الفساد. يعني غير الهضرولوجي.

كولشي عارف بلي حزب الاستقلال عندو استراتجية انتخابية مفروشة ولكن تاريخو عامر بالريع وتعيينات الأصدقاء والعائلات د الحزب ومناضلين وغيرهم من للي كيستقطبوهم في وزارة بركة ووزارات الاستقلاليين .

حزب الاستقلال قالك دار ندوة على محاربة الفساد فسلا تحت شعار “محاربة الفساد بالمغرب.. الواقع والتحديات”. آييه ندوة على محاربة الفساد.

فالحقيقة ملي كتسمع على هاذ النشاط كتقول هذا حزب عندو الشجاعة يهضر على الفساد ويهضر فهاذ الموضوع. لكن الحقيقة بين الأقوال والأفعال كبيرة بزاف. علاش؟؟؟.

توقيت تنظيم هاذ الندوة كيقولك هاذ النقاش بوليميك خاوي، حيث حنا دخلنا فزمن انتخابي. من جهة أخرى نزار دوز خمس سنين فالحكومة معمرو حل فمو على شي حاجة سميتها الفساد قبل ما يركب تا هو موجة الفراقشية.

قبل ما ينظم هاذ الندوة نزار بركة دوز خمس سنين ساكن فبيت الحكومة كياخذ الصاليير المزيان والتعويضات السخية وكيتهلا فالمناضلين ديالو وصحابو وحتا العائلة، ومعمرو هضر على محاربة الفساد.

المفروض نزار يعطي حصيلة ديال التدبير الحكومي ديالو ويبين لينا فين حارب الفساد وشجع الحكامة الجيدة والنزاهة والتدبير الديمقراطي وتكافؤ الفرص. ماشي يجي ينظر على المغاربة ويطنز عليهم حيث هو دابا كيهضر من موقع حكومي ماشي شاد الصف فالمعارضة بحال شي حزب من خارج التحالف الحكومي.

نزار مزال مجاوبش بشكل رسمي على وثائق نشراتهم جبروت بخصوص شرا واحد الأرض ديال فيلا بمليار سنتيم وشي صريف وطريقة ديالا الشرا كتشم فيها شي ريحة ماشي هيا هاذيك شرا بالنوار ومعطاش الشيك وفين كان حاط هذاك المبلغ ومنين جابو وعلاش ما احترمش مسطرة الشرا بالقواعد. هادشي مزال ما عليه جواب ..

ممكن نزار يخرج رسميا ويوضح شنو طاري فهاد لافير. كنتسناوه.

بركة وزير مالية سابق، عارف بلي كاع القطاعات فيهم اختلالات وهادي طبيعة بشرية، ولكن من باب الأخلاق السياسية يكشفهم، واخا تكون هاد القطاعات تابعة لحزبو، بحال ريع لارام وصفقات التجهيز وبناء السدود، اوصفقات وزازة بنسعيد، او صفقات تابعة لأحزاب أخرى تضارب المصالح فقضية برادة مع وزير الصحة ووو.