بقدرات مغربية 100 فالمية.. بوليس المغرب بدا يخدم بسيارات "أمان" و"مدار" الذكية فشوارع الرباط (تصاور) .

عمر المزين – كود////

بدات المديرية العامة للأمن الوطني، مع بداية هاد الأسبوع من يوليوز 2026، الخدمة الميدانية بسيارتي الدورية الذكيتين “أمان” و**”مدار”** فشوارع العاصمة الرباط، على أساس يتوسع العمل بهما قريب فالدار البيضاء وطنجة، ومن بعد يتعمم تدريجيا على باقي المدن الكبرى.

هاد السيارات الجديدة تصاوبات وتطورات بالكامل بكفاءات مغربية تابعة للأمن الوطني، وكتعتمد على أحدث تقنيات الذكاء الاصطناعي باش تعاون فالرفع من فعالية العمل الأمني وتحسين الخدمات المقدمة للمواطنين.

مصدر الصورة

سيارة “أمان” مجهزة بكاميرات كتشوف بزاوية 360 درجة، وكتقرا أوتوماتيكيا لوحات ترقيم السيارات، وكتتعرف حتى على الوجوه بشكل فوري، مع ربط مباشر بقاعات القيادة والتنسيق والوحدات الميدانية، باش تساهم فتنظيم السير ومحاربة الجريمة بسرعة وفعالية.

أما “مدار” فهي منصة مراقبة ذكية كتحول السيارات العادية إلى دوريات أمنية متطورة، وكتتوفر على كاميرات عالية الدقة كتراقب حتى ستة مسارات مرورية فآن واحد، بالإضافة إلى كاميرا بانورامية كتدور دورة كاملة فأقل من ثلاث ثوان، ونظام أضواء طوارئ متطور صاوب بتقنية الطباعة ثلاثية الأبعاد.

مصدر الصورة

كما كتحمل هاد الدوريات هوية بصرية جديدة كتسهل التعرف عليها فالطريق، ومجهزة بنظام تحديد الموقع الجغرافي والولوج المباشر لقاعدة البيانات المركزية عبر جهاز التنقيط.

وجا إطلاق هاد الدوريات الذكية من بعد استكمال مراحل التطوير والتجارب الميدانية وتكوين عناصر الشرطة اللي غادي يخدمو بها، باش يعزز الأمن الوطني جاهزيتو ويواكب التحديات المقبلة، خصوصا مع استعداد المغرب لاحتضان تظاهرات دولية كبرى، وعلى رأسها كأس العالم 2030.

مصدر الصورة