تقربلات فطاليان.. ساكنة بولونيا خرجات فمسيرة تضامنية مع عبد الرحيم وعمدة المدينة وحاكم الجهة ونائب رئيس الوزراء كيعلنو تضامنهم مع العائلة (فيديو+ تصاور) .

كود – عثمان الشرقي//

دخلات قضية وفاة المغربي عبد الرحيم فقير، مرحلة جديدة بعدما قررات النيابة العامة تفتح تحقيق رسمي مع ستة دالأشخاص شاركو فعملية التدخل، ولي هما جوج ديال البوليس وربعة من عناصر الإسعاف.

وفنفس الوقت خرجو المئات ديال المتظاهرين ليلة لبارح لشوارع مدينة بولونيا الإيطالية، باش يطالبو بكشف الحقيقة وتحقيق العدالة.

وبدات الاحتجاجات بشكل سلمي، قبل ما تتحول لمواجهات مع قوات الأمن، اللي استعملات العصي والكريموجين والما باش تفرق المحتجين..

مصدر الصورة

من جهتها، عيّنات عائلة عبد الرحيم المحامي الإيطالي فابيو أنسيلمو للدفاع عليها، وطالبات باش يكون التحقيق مستقل وما تديروش نفس الجهة الأمنية اللي شاركات فالتدخل، انسجاماً مع مبادئ المحكمة الأوروبية لحقوق الإنسان.

https://x.com/i/status/2079221392504172931

وأكد المدعي العام أن التحقيق ما غاديش يعتمد غير على الفيديو اللي انتاشر فمواقع التواصل الاجتماعي، ولكن غادي يشمل جميع الوقائع اللي سبقات التدخل.

وفنفس الوقت، خرجو المئات من الناس، الاثنين، لساحة نيتونو بمدينة بولونيا، فوقفة احتجاجية دعا ليها عمدة المدينة ماتيو ليبوري، للمطالبة بكشف الحقيقة وتحقيق العدالة لعبد الرحيم فقير.

ورفعو المحتجين لافتات تكتب عليها “العدالة لعبد الرحيم”، ورددوا شعارات كتطالب بمحاسبة المسؤولين وكشف جميع ملابسات الوفاة.

https://www.facebook.com/share/v/191x1LFzs8/

وقالت حاكمة جهة إيميليا رومانيا، ميشيل دي باسكال، بلي الجهة كاملة واقفة مع عائلة عبد الرحيم ومع مدينة بولونيا، وأكدات أن وفاة أي واحد فتدخل أمني خاص يكون معه تحقيق شفاف ومستقل.

مصدر الصورة

وفوسط الوقفة، تعرضات خديجة، أخت الراحل، لأزمة صحية منعاتها تقول كلمتها، ومن جهتها قالت يسرا بنت أخت عبد الرحيم، بلي عمها “ماشي غير خبر”، ولكن كان عندو عائلة وخدام وكيحلم بمستقبل حسن، وطالبت بالحقيقة والإنسانية قبل أي حاجة.

https://www.facebook.com/share/v/1RgfwA9xxa/

كما فتحات هيئة الصحة المحلية تحقيق داخلي على طريقة تدخل طاقم الإسعاف، كيف ما أكدات محامية عبد الرحيم، باربرا سبينيلي، بلي الراحل كان ساكن بشكل قانوني فطاليان، وكان عندو قرار من المحكمة كيخليه يبقا فالبلاد، أما الهضرة ديال “حراگ” أو تاجر مخدرات “ما عندوش أساس” كتقول المحامية.

ومن جهتو، عبّر نائب رئيس الوزراء الإيطالي ماتيو سالفيني على تضامنو مع عائلة الضحية، ودعا لانتظار نتائج التحقيق وعدم التسرع فإطلاق الأحكام.

مصدر الصورة

التشريح الطبي لي كديرو لجنة مستقلة ديال مجموعة من الأطباء الشرعيين مزال ما بين السبب الحقيقي للوفاة، فالوقت لي كتحاول فيه صحفية يمينة تروج لرواية انه كان مريض اصلا وعلى سبة.

مصدر الصورة

مصدر الصورة