خلا الموت د المهاجر المغربي عبد الرحيم فاكر، البالغ من العمر 43 سنة، فمدينة بولونيا شمال إيطاليا، موجة غضب واسعة، بعدما انتشر فيديو كيوثق للحظات الأخيرة ديالو خلال تدخل لبوليس، وسط مطالب حقوقية وسياسية بفتح تحقيق شفاف يكشف ظروف الوفاة.

وحسب المعطيات المتوفرة، الواقعة كانت نهار الأحد 19 يوليوز بلعشية ، من بعد ما توصلات الشرطة ببلاغ على رجل كان فحالة هيجان فواحد الشارع بحي “بيلايسترو” فبولونيا، وفاش وصلو تدخلو لبوليس ولاحوه فالأرض وقيدو يديه ورجليه.

الفيديو اللي انتاشر بشكل واسع فالإعلام الإيطالي، بان فيه المواطن المغربي وهو فالارض وكيعاود عبارات كيطالب فيها بالمساعدة وكيقول “ما قادرش نتنفس”، فمشهد أثار تساؤلات كبيرة حول طريقة التدخل واستعمال القوة أثناء عملية التوقيف.

وحسب لمعطيات لمتداولة ، فهاد الواقعة خرجات حقوقيين وأحزاب معارضة فإيطاليا للمطالبة بتوضيحات، بحيت شبه بعضهم ظروف وفاة عبد الرحيم فاكر بقضية الأمريكي جورج فلويد، اللي مات خلال تدخل للشرطة فمدينة مينيابوليس سنة 2020، معتبرين أن طريقة التوقيف خاصها تكون موضوع تحقيق دقيق.

وحسب تقارير إعلامية إيطالية، كان عبد الرحيم فاكر، اللي من أصول مغربية، مقيم فإيطاليا من سنوات، بعدما انتقل ليها وهو صغير، وكان كيسير شركة صغيرة متخصصة فخدمات الشحن والتفريغ.

وزادت شارت هاد تقارير إلى أن لمتوفي كان كيعاني من مشاكل صحية مرتبطة بالقلب وضيق التنفس.

ومن جهتها، كالت خديجة، خت الراحل، فتصريحات نقلتها وسائل إعلام إيطالية، إنها باغية تعرف الحقيقة كاملة، مؤكدة أن الإنسان ما خاصوش يموت بهاد الطريقة، وأن التعامل مع الأشخاص اللي كيمرو من حالات اضطراب خاصو يكون بالتهدئة.

ودخلات النيابة العامة فبولونيا على الخط، وفتحات تحقيق فظروف الوفاة، مع إخضاع تسجيلات كاميرات الشرطة والمعطيات المرتبطة بالتدخل للفحص، فانتظار تحديد المسؤوليات القانونية.

وفالمقابل، شهدات مدينة بولونيا وعدد من المناطق الإيطالية وقفات احتجاجية، كما أعلنت نقابة إيطالية تنظيم إضراب احتجاجا على الواقعة، وسط استمرار المطالب بكشف الحقيقة وضمان عدم تكرار مثل هاد الحوادث