نايضة وسط المحامين.. تسريب صوتي لعضو فهيئة المحامين: الجامعي سير بحالك وقانون المهنة إيجابي وقيادات جمعية هيئات شخصنو المشكل مع وهبي وكاين تخلويض فتدبير هاد الخلافات .

مصدر الصورة

كود الرباط//

تسريب صوتي جديد خرج من هيئات المحامين، من أحد المحامين المعروفين وقامات، كشف المستور حول الخلافات الحقيقة حول قانون مهنة المحاماة للي مشا للمحكمة الدستورية.

التسريب كيتهم أطراف ف المحاماة بشخصنة مشكلة القانون ف شخصية عبد اللطيف وهبي، وداروها معركة.

وحسب التسريب الصوتي للي حصلت عليه “گود” وهو عبارة عن محادثات فواتساب غالبا بين أعضاء إحدى الهيئات ديال المحامين فالمغرب، وهضر على دروس كيقدموها شي قامات باسم الدفاع عن مهنة المحاماة بحال عبد الرحيم الجامعي، وقال ليه سير بحالك وعطينا تيساع، وذكر فاش كانو المحامين دايرين معركة مشا كيترافع على الامير هشام العلوي.

نفس التسريب، قال فيه المحامي بلي كاين بزاف د التخلويض ف تدبير خلافات مشروع قانون مهنة المحاماة، مضيفا بلي هاد القانون راه فصالح المحامين وايجابي بنسبة 90 فالمائة، مشيرا بلي بعض النقط الخلافية ممكن تصويبها ومناقشتها مع المؤسسات.

واستغرب ذات المحامي من بعض قيادات جمعية هيئات المحامين بالمغرب، واتهمهم بشخصنة الخلاف باش مشاو نيشان لراس وهبي وخلاو الاهم.

النقيب السابق عبد الرحيم الجامعي كان قال فلقاء مؤخرا أن النقاش الدائر حول مشروع القانون المنظم لمهنة المحاماة يتجاوز الخلاف المهني مع وزير العدل، ليعكس، بحسب تقديره، توجهاً سياسياً ومؤسساتياً يرمي إلى إعادة تحديد موقع المحاماة داخل منظومة العدالة وتقليص مساحة استقلالها.

وقال الجامعي، إن الأزمة الحالية ليست منفصلة عن مسار طويل من التوتر بين الدولة ومؤسسات المهنة، مؤكداً أن مشاريع متعددة لإصلاح قانون المحاماة سبق أن كانت موضوع نقاش داخل جمعية هيئات المحامين بالمغرب ومع مسؤولي وزارة العدل، قبل تجميدها أو سحبها وإعادة طرحها في صيغ مختلفة.