غنتابع فوربيدن ستوريز وبغيت قضاء بلادي يسمع لهاد الجمعية. راهم نشرو اسمي وقالو باللي دولتي كتجسس علي بلا ما ياخذو تلفوني وباش عيطت عليهم ما عمرهم ردو علي .

منذ

كود كازا ///

فيوليوز 2021 وبالضبط ف19 من هاداك الشهر نشرات جمعية اسمها “فوربيدن ستوريز” لائحة ديال صحافيين وحتى شي سياسيين قالت باللي اجهزة امنية فالمغرب كتجسس عليهم بعد ما تعرضات تلفوناتهم للتجسس ببرنامج التجسس الاسرائيلي “پيگاسوس”. قالت هاد المؤسسة بللي توصلو لهاد الشي بعد ما عرضو ارقام هاد الصحافيين على مختبرات امنستي. من بين الاسماء اللي تنشرات فالموقع الرسمي لهاد الجمعية كان اسمي احمد نجيم كمدير نشر ل”كود.ما”.

هاد السيمانا خرجات كبريات وسائل الاعلام الدولية خاصة الفرنسية والاسبانية تحقيق على نفس الموضوع. فكلشي اللي نشروه ما كاين حتى اشارة باللي كاين اللي احتج على حضور اسمو فهاد اللائحة.

انا ماشي غير احتجيت. قدمت شكاية للوكيل العام ديال كازا ف2021 وعطى تعليماتو باش تسمع لي الفرقة الوطنية. هاد الشي اللي كان. دابا هادي 5 سنين ما بان حتى جديد فقضيتي.

شكايتي كانت ضد هاد المؤسسة. علاش جبدات اسمي. كيفاش عرفات باللي تلفوني مخترق وما عمرها حتى اتصلات بي. بل اكثر من هاد الشي. اتصلت بمسؤولة على نشر الاسماء وطلبت منها فايميل تفسير على ادراج اسمي. ما جاوباتنيش. عيطت عليها فالتلفون ووعداتني ترجع تتصل بي ووالو. بقيت كنحاول حتى عطيت حماري.

هاد السيمانا باش خرجات صحف دولية تحقيقات على المغرب وعلى پيگاسوس اللي ما بقى حد خدام بيه من 2021 ما كاين حتى حد جبد لا الشكاية اللي تقدمات ضدهم ولا حتى الاحتجاجات على نشر الاسماء وعلى المعايير اللي عتامدوها.

دابا مع الانابة القضائية ممكن نتابع قضائيا هاد المؤسسة من المغرب ماشي فباريس. كاين اتفاق مغربي فرنسي يسمح لي بهاد الشي.

نشر اسمي راه وقاحة منهم. شكون عطاهم هاد الحق. بعدا غير يقولو لي. بغيت نعرف كذلك من “فوربيدن ستوريز”: اش من رقم واش من تلفون تجسسات علي دولتي. عندي جوج مغربي واسباني. واش اصلا هاد المؤسسة عندها ارقامي.

اللي متأكد منو ما عمرني تواصلت مع هاد المؤسسة. ما عمر شي حد، فالخارج او فالداخل، شفر لي تلفوني، باش نقول راهم دارو عليه بحث فمختبرهم ديال امنستي”.

يكون عندهم حساب مع المغرب يخرجو ليها كود، يركبو علي ما عندهمش الحق وما غاديش نتنازل على حقي.

مصدر الصورة