قال محمد شوكي، رئيس حزب التجمع الوطني للأحرار، بللي المغاربة اليوم ما بقاوش محتاجين شي حد يجي يعلمهم شكون هما، ولا يوزع عليهم الشواهد فالنية ولا فالمعقول.

شوكي قال اليوم السبت 18 يوليوز 2026 بللي “زاكورة ماشي إقليم بعيد باش نتشفاو فيه ولا نبخسو ناسو، زاكورة إقليم ديال الرجال والنساء اللي عطاو للمغرب فالمقاومة وجيش التحرير، وإقليم ديال الصبر والعمل والوعي السياسي. هاد الناس كرامتهم أكبر من أي خطاب كيحاول يصغر منهم.”

ووضح باللي أنالخطاب السياسي خاصو يكون خطاب كيحترم المواطن، ماشي خطاب كيقوم على التنقيص من قيمة الناس ولا على السخرية من المناطق. وقال: “اللي كيبخس المغاربة عمره ما غادي يقنعهم، واللي كيحترمهم ويخدمهم هو اللي غادي يربح ثقتهم.”

وأضاف من زاكورة “حنا ما جيناش نقولو لناس هاد لمدينة باللي راكم بعاد ودراوش. حنا جينا نقولو بغينا نكملو المشاريع المائية، وبغينا خط سككي يربط الراشيدية بميناء الناظور غرب المتوسط، وبغينا القطاع المنجمي يتطور، وبغينا السياحة تزدهر، وبغينا شباب المنطقة يلقاو فرص الشغل فبلادهم.”

شوكي جبد العدالة المجالية باش قال باللي ماشي شعارات كتقال فوق المنصات، ولكن أوراش كتتنجز على الأرض، واستثمارات كتغير حياة المواطنين، وسياسات كتفك العزلة على العالم القروي والمناطق اللي عانت لسنوات من التهميش.

رئيس الاحرار وضح باللي “المغاربة اليوم واعيين، وكيعرفو يميزو بين اللي كيبني الأمل واللي كيعيش على تبخيس العمل السياسي ومهاجمة المؤسسات” واضاف “حنا غادي نبقاو مركزين على خدمة المواطنين، والدفاع على مؤسسة الحكومة، ومواصلة الأوراش الإصلاحية” اللي طلقها سيدنا وبللي ” الجواب الحقيقي ماشي هو الكلام بل الانجاز”